Nativity of the Lord (A)

PAGSALIG SA DIYOS!

“May isa ka manunulat nga nagsugilanon sa isa ka pari nga nakakita kay Hitler sa personal. Ang manunulat naghambal sang tanan nga mga kalainan nga iya nahibalu-an nga ginhimo ni Hitler agud ang pari maakig kag masaklaw kay Adolf Hitler. Sa katapusan, ang manunulat nagpamangkot sa pari: “Pads, ano ang itsura ni Hitler?” Ang pari nagsabat: “Ang iya itsura pareho man sang itsura sang tanan nga mga tawo. Buot silingon, pareho sang itsura ni Kristo!”

Subong nga tion, aton ginasaulog sing malipayon ang Paskwa sang Pagkatawo ni Kristo. Apang, malipayon gid man bala ang tanan nga Pilipino sa sini nga Paskwa? Sarang pa bala tamyawon sang mga nahalitan sang mga kalamidad, ukon trahedya sa kabuhi… katulad sang mga pamilya sang mga ginpamatay tungud kay “kuno” sila “tulak” ukon “nagagamit” sang druga… mga pamilya nga nangin biktima ang  “hold-up” ukon “kidnapping” kag iban pa nga mga trahedya sa kabuhi, katulad abi sang hinali nga kamatayon, ukon malubha nga balati-an, sang “Merry Christmas”? Kon aton lang  ibutang ang aton balatyagon sa ila ginabatyag, ayhan maka-ugayong gid kita: “Ano na ini ang nagakatabo sa kalibutan, partikularmente sa aton pungsod?” Apang kon kita magtulok lamang sa Bata nga yara sa pasungan, piho nga aton man madumdoman ang pagsiling: “Ano ini ang natabo sa kalibutan?” Panumdoma bala: Ang Dios wala lang nagpadala sang Iya nga anghel ukon proxy.

Tungod palangga gid kita sang Dios, ginpadala gid Niya ang Iya Bugtong nga Anak sa nawong sang isa ka lapsag, kag ini nga Lapsag nagkabuhi nga imol, nag-agi man sa mga paghingabut tubtob nga patyon sang mga tawo nga amo ong rason sang Iya pagpakatawo.

Kon sa sini nga punto lamang naton ginapaayon ang aton panimuot, pat-ud nga ang Christmas magapahangop gid sa aton nga ang matuod nga kalipay indi sarang masukat o mabakal sa sining kalibutan. Gugma, paghidaet, kaayo, pagbinuligay,    paghangpanay – ini nga mga indi kalibutanon nga butang amo ang nagahimo sang aton Paskwa nga malipayon, masinadyahon, mabinungahon kag makahulogan.

   Ayhan sa sini nga tion manami nga binag-binagon naton kon ngaman nga nagahinatagay kita sang regalo sa sining tion sang “paskwa”. Ayhan ini tungud sa tradisyon nga aton na namuklatan? Ukon nahaylo na kita sang mga “commercial” nga aton nakikita kag nabati-an? Ukon aton gid man nahibalu-an nga dapat kag bagay gid nga maghinatagay kita sang regalo? Daw sa may “nagatulod” sa aton nga daw “natural” lang sa aton, nga daw “obligasyon” pa gani naton nga maghatag sang regalo.

  Kalabanan nga mga ginikanan, amo sini ang ila nga balatyagon– obligado gid sila maghatag sang regalo sa ila mga anak kag mga ihado kag ihada! Ngaa bala amo sini ang nagaluntad nga balatyagon sa aton.

  Ginbantala sa aton ang dili-mapatihan nga Maayong Balita nga sa isa ka panahon kag isa ka lugar, ang Anak mismo sang Diyos nangin tawo katulad naton– dala ang aton kakulangan kag kaluya, luwas lamang sa sala!

  Sa malip-ut nga pulong, ginsugid sa aton nga ang Diyos nga Amay nagapalangga sa tagsa-tagsa sa aton sa bagay nga ginpadala Niya ang Iya nga pinalangga nga Anak agud akuon ang aton kinabuhi! Ini ginasugid sa aton paagi sa isa ka Lapsag nga may lawas kag dugo, nga natawo karon sa Bethlehem, nga amo ang labing daku nga REGALO sang Amay sa aton. Sa sini nga adlaw ang aton Amay sa langit nagahambal sa aton: “Palangga ko ikaw. Importante ka sa Akon!” 

  Amo gani nga bisan sa tion sang mga pagtilaw ukon mga palaligban nga aton ginasumalang adlaw-adlaw , nagalapus ang paghigugma sang Diyos sa tagsa-tagsa sa aton tungud kita MAHAL para sa Iya.

LIGHTER SIDE:

EARLY SHOPPER

It was Christmas and the judge was in a merry mood as he asked the prisoner, "What are you charged with?" "Doing my Christmas shopping early", replied the defendant. "That's no offense", said the judge. "How early were you doing this shopping?" "Before the store opened." 

FOOD FOR THOUGHT

“Christmas is the spirit of giving without a thought of getting. It is happiness because we see joy in people. It is forgetting self and finding time for others. It is discarding the meaningless and stressing the true values.”

(Thomas S. Monson)

4th Sunday of Advent (A)

PAGSALIG SA DIYOS!

May isa ka bana nga naglahog sa isa ka pari: “Bal-an mo Father, si San Jose gid ya ang pinakapaborito ko nga santo sa tanan… Kay daw uloanggid gid ya kami, tungod wala gid ko ya tingug sa akon pamilya. Ang akon iya nga asawa ang “Speaker of the House”.

Ang sikat nga persona sa sini nga Domingo amo si San Jose. Matuod gid man nga sya mahipuson tungod bisan buklaton mo pa ang bug-os nga Biblia, wala gid sya sang may namitlang nga isa ka tinaga. Ginasugid sang Ebanghelyo nga sya isa ka “VIR JUSTUS” – matarong nga tawo. Ginpahayag ini sa punto nga antes sila pormal nga magpuyo ni Maria, nabal-an niya nga nagabusong na sya. Gani bilang isa ka matarung nga tawo, iya gindesisyonan nga i-divorce sya sa tago. Apang sang siya nagdamgo kag ginpahangop nga ang Espiritu Santo amo ang naglalang sang ginadala niya kag indi sang tawo, iya sya ginbaton sa iya balay.

May hulobaton nga nagasiling: “Fortiter in re, suaviter in modo”. Dapat kita mangin matig-a sa aton mga prinsipyo apang hagan-hagan sa aton pagginawi. Ang isa ka matarung nga tawo wala lamang nagapangita masami sang hustisya kundi nagapahaganhagan sang hustisya paagi sa pagkaluoy. Sarang kasohan ni San Jose si Maria. Pwede niya sya pahaboyan sang bato hasta mamatay, nga amo ang sahi sang penalidad para sa mga “salawahan” nga babaye sa iya panahon. Apang iya ginpili ang aksyon nga magaluwas sang kabuhi ni Maria kag dignidad niya. Tungod sini, sya nangin sulondan sang matuodtuod nga pagkamatarung!

Katapusan na nga Dominggo sa panahon sang Adviento ang aton ginasaulog subong, kag malapit na gid lang nga matawo ang aton Manluluwas. Apang ano bala nga sahi sang Manluluwas ang matawo sa aton tunga? Amo ini ang ginasabat subong sang aton nga Ebanghelyo- kon paano nahanabo ang pagkatawo ukon ang “pagbusong” sa aton Ginuo!

Suno sa aton nga Ebanghelyo, Siya igabun-ag sang isa ka dalaga nga kalasalon, nga nasapwan na nga nagabusong, sa isa ka bata nga pagatawgon nga Emmanuel– “ang Diyos kaupod naton”, nga magaluwas sa Iya mga  tawo sa sala. Isa ini ka hitabo nga mabudlay mahangpan sang aton tawohanon nga panghuna-huna sa bagay nga bisan si Jose, sa iya ordinaryo nga painu-ino, indi man makahangup sini!

Kon kita man siguro ang sa sitwasyon ni Jose, ayhan makapanumdum man kita nga magbuhat man sang iya “kuntani” nga buhaton– ang pagbiya sa kay Maria sing “tago” agud nalang mapahilayo sa nagapaabut nga “kahuy-anan”. Kahuy-anan nga indi lamang kay Maria kundi bisan pa man sa iya! Hamakon mo, ang imo palakaslan, nagabusong na nga wala mahibal-an ang tatay?- Makahuluya kag makahaladluk!

Apang ginpahayag sang Diyos paagi sa anghel ang Iya nga binubu-ot nga ini nga bata, ginbusong paagi sa gahum sang Espiritu Santo kag Siya gintagna na nga mangin Manluluwas sa mga tawo– kay sa Diyos wala sang indi sarang mahimo. Sa bagay nga INDI siya dapat magkahadluk!

Madamo sang mga hitabo sa aton kabuhi nga “nahadluk” kita, ayhan tungud sang aton mga sakit, sang mga pagyaguta sang tawo, ukon mga kahuy-anan. Tulukon naton si San Jose sa iya nga pagtuo kag kabay nga katulad niya MAGSALIG kita kag INDI MAGKAHADLUK kay ang Diyos amo ang aton Emmanuel– ang Diyos nga kaupod naton!

Si San Jose nagalatagway sa kon ano ang dapat nga pagahuptan naton sa aton tagipusu-on sa mga tini-on nga kita nagasumalang sang mga pagtilaw kag masami nga pagsalangisag sang aton nga painu-ino kon ano bala ang aton dapat nga himuon sa mga tini-on nga naalang=alang kita sa aton mga desisyon. Siya nagatudlo sa aton nga MAGMASINALIGON sa Diyos.

LIGHTER SIDE:

THE UNDERSTANDING BOSS

Office worker: Sir?.

Boss: Yes? What is it now?.

Office worker: Please can I have a day off next week to do some late Christmas shopping with my wife and our six kids?.

Boss: Certainly not!.

Office worker: I knew you’d be understanding, sir. Thanks for getting me out of that terrible chore..

FOOD FOR THOUGHT

“With courage you will dare to take risks, have the strength to be compassionate, and the wisdom to be humble. Courage is the foundation of integrity.” (Keshavan Nair)

3rd Sunday of Advent (A)

TAGIPUSU-ON NGA NAGAHANDA

Ginsaulog naton subong ang “Gaudete Sunday”. Sa panahon sang Adviento– panahon sang pagpa-abut kag pahanda sang kaugalingon paagi sa paghimo sang tadlong nga pagkabuhi– kita NAGAKALANGKAG na sa matabo nga madali na gid lang matawo ang Manunubos sang kalibutan. Si San Juan amo ang Iyang Manugbalita sa Iyang pag-abut kag siya man amo ang magahanda sa tagsa ka tagipusuon sang tawo nga magabaton sa Iya sa ilang kinabuhi.

Sa aton nga Ebanghelyo subong, aton man makita ini nga “kalangkag” sa tagipusuon ni Juan. Antes matabo ang iya paghimaya sa Diyos paagi sa pagkamartir, sa diin siya pagapapugutan sang ulo ni Herodes, siya anay nag-usisa sang minatuod, kon bala ang iya ginhandaan sa pagtawag sa mga tawo sa mensahe sang pagpanibag-o, amo na gid ang “minatuod” nga Manluluwas, kay sa pagkamatuod, madamo ang mga “nagapakuno-kuno” nga nagsiling nga amo na Siya! Sa bagay nga si Juan nagsugo sa iya mga gintutun-an sa pagpamangkut “personal” kon bala Siya na gid man amo ang iya ginatumud, kay basi wala man lang pulos ang iya panawagan sa pagpanibag-o! “

Katahum sang sabat sang aton Ginuo. Indi paagi sa mga ideya ukon mga prinsipyo, ukon mahaba nga mga palabra, kundi paagi lamang sa pagtudlo sa mga “patima-an” nga makita sa Iya mga BINUHATAN– ang mga bulag makakita, ang mga piang makalakat, ang mga aruon gin-ayo, ang mga bungol makabati, ang mga patay ginbanhaw, kag ang Maayong Balita ginwali sa mga imol!

 Sa sining Gaudete Sunday, Si Kristo nagatudlo sa aton nga, bilang Iya mga tumuluo, kinahanglan naton nga maghimo sang konkreto nga buhat sang gugma. Kay sang sya ginpamangkot sang mga sumulunod ni San Juan Bautista kon Siya gid bala ang Mesias, wala Siya nagsabat sang “huo” o “indi” kundi nga Iya ginmitlang ang panagna ni Isaias nga propeta (Is. 35,6). Ini nga propesiya indi lamang tinaga o palapaw kundi konkreto nga mga tanda o buhat. Kag ini amo ang sukatan kag pweba agud ila makilal-an kon sin-o gid bala ang matuod nga Mesias.

Buot silingon, ang Advento nagaagda sa aton sa paghimo, paghulag o pag-aksyon. Kon kita minatuod sa aton handum sa pagsug-alaw kay Kristo sa aton mga taguipusuon sa sini nga Christmas, kita ginahangkat gid sa isa ka personal nga “METANOIA” – pagbag-o sang aton taguipusuon. Ang iban nga mga tawo nagapanumdom nga ang kondisyon para sa ila agud magbag-o o magliso pakadto sa kaayo amo nga ang iban magbag-o sang una anay. Daw pareho bala ina sa mga hambalanon nga: “Untatan ko lang nga halitan siya kon untatan niya danay nga sakitan ako.” “Patawaron ko siya kon makita ko danay nga nagahinulsol siya.” “Ma-reconcile lang ako sa iya kon siya ang mag-una.” Apang, ikaw kag ako nakahibalo gid nga indi naton mapwersa o mapilit ang isa ka tawo sa pagbag-o. Ang pagbag-o dapat mag-umpisa o magsugod sa aton kaugalingon… sa aton gid nga tagipusu-on. Gani ipakita ta ang aton pagka-Katoliko nga Kristiano sa aton pagkabuhi sang husto kag maayo kag mapinalanggaon!

Sa aton BUHAT, kita makilala. Sa aton buhat makita kon matuod kita nga nagbag-o! Amo ini ang Adviento– isa ini nga tini-on sa aton paghanda sa isa ka tadlong nga dalan nga pagaagyan sang aton Ginoo nga matawo sa aton tunga. Ini nga alagyan amo ang alagyan sang aton nga tagipusu-on sa diin Siya mahatagan sing duog agud Siya mabun-ag sa aton kaugalingon. Labing importante ini nga ‘dalan sang tagipusu-on’ tungud sa pagkamatuod ang paskwa indi makita sa pang-gwa nga laragway, kundi sa kaalibuturan sang aton pagkatawo. Sa palaabuton nga pagkatawo sang aton Ginoo aton ginahanda ang nagaka-igo nga lugar sa diin Siya magapuyo– sa aton TAGIPUSUON.

LIGHTER SIDE:

JONAH & THE WHALE

A little girl was talking to her teacher about whales.
The teacher said it was physically impossible for a whale to swallow a human because even though they were a very large mammal their throat was very small.
The little girl stated Jonah was swallowed by a whale.
The teacher reiterated a whale could not
swallow a human; it was impossible.
The little girl said, "When I get to heaven I will ask Jonah."
The teacher asked, "What if Jonah went to hell?"
The little girl replied, "Then you ask him."

 FOOD FOR THOUGHT

“Do your little bit of good where you are; it's those little bits of good put together that overwhelm the world.”

(Bishop Desmond Tutu)

2nd Sunday of Advent (A)

KAINIT SANG ESPIRITU SANTO

Sa daan nga Kasugtanan sang Bibliya, ang imahen sang kalayo tuman ka makahulugan sa “giho” sang Diyos kag sang Iya mga ginabuhat sa kalibutan kag sa tagsa ka kabuhi sang tawo. Ang Diyos kon kaisa, nagapahayag sang Iya kaugalingon paagi sa kalayo, katulad sang Iya nga pagpahayag kay Moises sa “nagadaba-daba” nga kahoy nga wala nagakasunog. Sa libro ni Ezekeil nga Propeta ang Diyos nagapahayag sang Iya nga “pagpangapin” paagi sa imahen sang kalayo (Ez. 1:4, 13). Sa kay Isaias nga Propeta ginpahayag man ang “silot” sang Diyos paagi sa kalayo (Is. 66:15-16). Sa Bag-o nga Kasugtanan, ang kalayo ginagamit sang Espiritu Santo nga imahen sa “pagpatin-aw kag pagpaninlo” (Mt. 3:11 & Bin. 2:3).

Sa aton Ebanghelyo subong ginapakita si Juan Bautista nga “nagasilabo” sa iya nga balatyagon sa pagpakilala sa aton Ginuo kag sa pag-abut sang Iya nga ginharian. Ginasiling sa Ebanghelyo nga si Juan Bautista “napun-an sang Espiritu Santo bisan nga yara pa siya sa tagu-angkan sang iya nga iloy” (Lk. 1:41). Ining “kalayo” sang Espiritu Santo amo ang nagtulud sa iya nga mangin “Manugbantala” sang manug-abut nga Manluluwas!

Ang mensahe ni Juan Bautista amo ang “pagpamukaw” sa mga tawo nga nagapatumbaya kag daw sa mga “wala sing labut” sa mga nagakahanabo. Isa ka pagpanawag sa pagkilala sa aton Ginuo sa aton tunga, kag sa pagliso sa Iya kon kita nagtalang sa ginapaabut nga matarung nga pagkabuhi. Si Juan nagapahanumdum sa aton nga “Iya” kita sang Diyos! Kita ginbuhat sa Iya laragway sa bagay nga dapat magkabuhi kita sang nagakaigo bilang Iya mga anak!

Ang tanan nga mga “artificially-made roads” nga aton ginaagyan subong nag-ugat sa mga alagyan nga ginpaobra sang mga hari sang una pa agud sila man ang magaagi dira. Ginatawag ina nga “the king’s highway”. Ginakay-o lang ina kon ang hari kinahanglan nga mag-agi dira. Si San Juan Bautista ang nagpreparar sa alagyan sang Kristo nga Hari. Sya nagasinggit sa pagtadlong kag pagtapan sang mga dalan bilang preparasyon sa pag-abot sang Hari nga Manunubos. Kay para sa iya, amo lang ini ang paagi agud piho nga maangkon gid naton ang kaluwasan sang manug-abot nga Ginuo.

Sa pagkamatuod, ang pinakalip-ot kag pinakamadasig nga distansya sa tunga sang duha ka punto amo ang isa ka tadlong nga linya. Kon ang Dios yara nagatindog sa isa ka lugar kag kita yara man sa pihak nga punta, ang tadlong kag matapan nga alagyan indi lamang nagapahapos sang aton pagkadto sa Iya kundi nagapadasig gid.

Ang ginasinggit ni San Juan nga pagtadlong kag pagtapan sang dalan bilang takus nga pag-aman sa pag-abot sang Ginuo wala nagatumod sang minatuod nga ginatapakan ta nga mga kalsada, pedi-road o alagyan kundi sa pagtadlong kag pagtapan sang aton kabuhi. Ang aton kabuhi amo ang matuod nga dalan kon sa diin magaabot ang Manluluwas. Gani kon ang aton kabuhi gatiko-tiko, lubak-lubak, kudol-kudol, ukon ang nagalakat dira daw sa piang o daw ginbalda pagkatapos, ti kon ikaw ang hari, maagi ka man bala dira? Si San Juan Bautista amo ang pinakamaayo nga Secretary sang DPWH sang bisan ano man nga pungsod. Ngaman? Tungod siya indi “corrupt”. Siya mismo isa ka tadlong kag matapan nga dalan. Nahimo niya nga ang pag-abot sang Ginuo indi lamang madasig kundi mahupos kag matawhay! Amo man tani sini ang aton kabuhi subong. Sa sining panahon sang adbiento, aton  ginalantaw ang sahi sang kabuhi nga aton gina-agyan… ang dalan sang aton tagsa ka tagipusu-on. Ayhan matahum nga aton pagapamalandungan sing madalum kon bala ang aton pagkabuhi nasanto sa isa ka tadlong nga pag-ginawi. Diri kita naga-obra sang dalan nga pagaagyan sang aton Manluluwas.

LIGHTER SIDE:

MISUNDERSTOOD

An eight-year-old boy went into a grocery store and picked out a large box of laundry detergent. The grocer walked over and asked the boy if he had a lot of laundry to do. "Oh, no laundry," the boy said, "I'm going to wash my dog." "But you shouldn't use this to wash your dog," said the grocer. "It's very powerful and if you wash your dog in this, he'll get sick. In fact, it might even kill him." But the boy was not to be stopped and carried the detergent to the counter and paid for it. A week later, the boy was back in the store to buy some candy. The grocer asked the boy how his dog was doing. "Oh, he died," the boy said. The grocer said he was sorry, but added, "I tried to tell you not to use that detergent on your dog." "Well, the boy replied, "I don't think it was the detergent that killed him." "Oh? What was it then?" "I think it was the spin cycle!"

FOOD FOR THOUGHT

“If you can't explain it simply, you don't understand it well enough.” (Albert Einstein)

1st Sunday of Advent (A)

IYA PRESENSYA YARA SA ATON TUNGA

“May estorya nahanungod kay Colonel Davenport, Speaker sang Connecticut House of Representatives nga natabu sadto anay sang 1789. Isa ka adlaw, samtang naga-session ang mga Kongregista, hinali lang nga nagdulom ang langit kag kahawaan. Ang iban nga mga Congressman naglantaw sa bintana kag nagpanumdom nga katapusan na sang kalibutan. Dayon may yara nga kinagamo sa mga Kongregista nga nagpangayo sang “immediate adjournment”. Apang si Davenport nagtindog kag naghambal: “Mga halangdon nga mga Congressman, ang Adlaw sang Paghukom magaabut subong ukon pwede nga indi man. Kon indi ini ang katapusan, ti, wala kita nagakinahanglan sang “adjournment”. Pero kon amo na gid man ini ang tion, akon ginapili nga makit-an nga nagahimo sang akon obligasyon. Gani, akon ginahinyo nga dalhon diri ang mga kandila.” Gindala ang mga kandila kag ang session nagpadayon.”

Si Kristo nagapanawagan subong sa Ebanghelyo sa Pagbantay kag Paghanda. Ang pagbantay o paghanda wala nagatumod sa kahadluk nga ginatuga sang pagpanumdom nahanungod sa makangilidlis nga mga matabu sa katapusan sang kalibutan. Kundi ini nagakahulogan, kon kay Colonel Davenport pa, sang matutom nga paghimo sang aton mga obligasyon bilang mga Anak sang Dios kag Manunubli sang Langit. Buot silingon, ang matuod nga paghanda o ang indi pagpapirot-pirot sang mata amo ang pagkabuhi sang matutom nga pag-alagad sa Ginuo, nga nagasunod sang Iya mga Kasugoan kag nagapabilin sa Iya Grasya.

Nagasugud naman kita sa isa ka bag-o nga pahina sa aton Kalendaryo Liturhiko sa Simbahan paagi sa aton pagsaulog sang Panahon sang Adbiento. Ang Adbiento naghalin sa tinaga nga “adventus”, buot silingon “ang pag-abut”. Sa pag-abut nga hitabo, duha ka mga bagay ang aton ginatumud. Ang manug-abut, kag ang nagapa-abut.

Sa pagkamatuod, ang manug-abut nga aton ginahulat, naka-abut na kag nagkabuhi na gani upud sa aton, apang Siya magakari liwat kag maga-abut bilang isa ka Hari sa isa ka bag-o nga panahon– ang panahon sang kahimayaan. Apang sa tunga sining duha ka klase nga pag-abut, may yara kita nga dapat talupangdon– Ang Iya nga pag-abut sa aton “adlaw-adlaw” nga pagpangabuhi. Ini nga pag-abut amo ang masami nga wala naton ginatalupangud tungud nawili kita sa madamo nga mga kalingawan sa sining kalibutan. Sa bagay nga masiling naton nga kon nahanungud sa aton ginapa-abut, wala kita sang ‘problema’ tungudSiya sigurado nga naga-abut sa aton tunga. Ang ‘problema’ yara sa bahin sang nagapa-abut– sa ATON!

Sa una nga pag-abut sang aton Ginuo, Siya nagpahayag sang Iya kaugalingon sa isa ka kubos nga bata nga natawo sa pasungan, kag Siya padayon nga nagbantala nga Siya padayon nga magapahayag sang Iya kaugalinon paagi sa mga ginagutum, gina-uhaw, ginpabay-an, kag mga ginbilanggo!- Sa mga PINAKAKUBOS! Gani Siya nagapahanumdum sa aton subong nga “magmanginhanda” kita agud matalupangdan naton Siya! Padayon Siya nga “naga-abut” sa aton tunga paagi sa mga maluya, mga ginasika-sika, mga nawad-an kag mga nakulangan naton nga mga kautoran. Yara Siya sa ila.

Ang aton nga tema subong nga semana nagapahanumdum sa aton nga magmuklat sing maayo sang aton mga mata tungud kay sa masami ang Iya nga pagkari napun-an sang madamo nga mga “disguises”. Ayhan naga-abut Siya paagi sa mga “problema” nga aton ginasumalang, o sa isa ka “solusyon” sa aton mga palaligban… sa isa ka tawo nga mas labi nga nagakinahanglan sang sa aton… sa isa ka hitabo sa diin kita ginahangkat nga magmangin maalwan sa aton pagpaambit sang aton kaugalingon! Yara lang Siya!

Christ the King (C)

PAGHIGUGMA= SAKRIPISYO

“Mga pila lang ka tuig ang nagligad, sa isa ka bus sa Sweden, may isa ka soldado nga Amerikano nga nagsiling sa isa ka pasahero nga ara sa iya kilid: “Bal-an mo, ang Amerika na guro ang pinakademokratiko nga nasyon sa bilog nga kalibutan. Kay bisan ang mga pinakaordinaryo nga pumuluyo sarang makakadto sa ‘White House’ kag makapakigkita o makapakighala sa Presidente…” Ang tawo nga iya ginhambalan nagsabat sa iya: “Pigado ina eh. Diri sa Sweden, ang Hari kag ang mga tawo palareho nga nagasakay sa bus…” Sang nagapanaug ang Amerikano sa bus, siya ginsingganan nga siya nagapungko nga ingod gid ni King Gustav Adolf VI sang Sweden.”

Sa aton kabuhi, madamu gid sa aton ang wala pa makakita sang isa ka Hari sa personal. Kay masami, ara sila sa mga palasyo kag nagapungko sa ila trono. Kag wala sila sing igtalupangud sa pag-imbitar sa imo tungud ikaw ordinaryo lang nga tawo. Apang ang Kristo nga Hari lain sa ila. Wala ya Siya nagapungko sa trono, Siya nalansang sa Krus. Wala Siya sing korona nga puno sang diamante kag bulawan, korona nga tunukon ang nakatakud sa iya. Si Kristo Hari nga nagaantus, indi sang hari nga nagapalupos. Ngaman? Sa pagpahanumdom sa aton nga ang aton Hari ara MALAPIT kag indi malayo sa aton. Kon kita nagabatyag sing kaluya, kasakit kag kahuya, Siya UNA na nga daan nga nagbatyag sina. Wala ka bala makatalupangud nga sa tagsa ka hulot sang ospital may ara nga Krus? Ini agud ipahanumdom gid sa aton nga ang aton Hari malapit kag upod gid naton sa aton mga kakulangan, kasablagan kag kasakitan.

Halin pa sang una, nilibo ukon minilyon na ang nagpakamatay nga mga tawo para sa ila hari. Apang kita lang nga mga Kristiano ang nagadayaw sa isa ka hari nga nagpanginmatay para sa aton. Handa ka man bala sa pagpanginmatay para sa iya?

Ang laragway nga ginpakita subong sa aton ni San Lukas sang aton Ginuo, amo ang laragway sang isa ka  “hari” nga ang iya korona amo ang mga tunok, kag ang Iya trono amo ang kahoy nga Krus. Isa ka hari nga ginapasipalahan, ginapakahuy-an, kag ginayaguta sang iya kaugalingon nga katawhan... isa ka hari nga ginkabig nga “kriminal” sang iya mga kasimanwa… isa ka hari nga disidido nga manginmatay para sa iya mga katawohan!

Daw ano ka makatalanhaga ini nga selebrasyon sa pagtakup sang kalendaryo liturhiko sang aton nga Simbahan. Ini ginabuhat naton sa pagsaulog sang kapiestahan ni Kristo nga Hari– Cristo Rey.

Si Kristo ginapahayag naton nga aton Hari indi katulad sang mga hari sa sining kalibutan, kundi isa ka hari nga pinasahi. Pinasahi tungud ang Iyang pagkahari, KABALISKARAN sa mga hari sa sining kalibutan. Siya indi sang hari nga gina-alagaran, kundi hari nga NAGA-ALAGAD! Siya indi hari nga nagapamigos kundi hari nga NAGPAPIGOS agud sa pagbayad sang aton kasal-anan! Siya indi hari nga NAGADUMUT kundi Siya hari nga sa gihapon BUKAS SA PAGPATAWAD!

Ini ginapahayag subong sang aton Ebanghelyo sa Iya mga pulong nga ginsambit sa isa ka kriminal nga nagpangayo sang kapatawaran. Siya nagsiling: “Nagasiling ako sa imo, karon gid nga adlaw mangin kaupod ka nakon sa Paraiso!”

Amo ini ang aton Hari! Hari nga napun-an sang paghigugma, paghangup, kag pagpatawad. Diri naton ginabase ang aton pagkabuhi bilang Iya sumulunod!

Sa aton nga panahon subong, sa diin daw ginatabunan na ang balor sang ‘sakripisyo’ tungud sa ginatan-ay sang kalibutan nga kabuhi  sing palupos, kita ginahangkat sang Krus ni Jesus. Ang amatuod nga paghigugma ginaupdan sang mabug-at nga Krus tungud sa pagkamatuod ang paghigugma isa ka SAKRIPISYO!

FOOD FOR THOUGHT

“I would rather die and come to Jesus Christ than be king over the entire earth. Him I seek who died for us; Him I love who rose again because of us.”

(St. Ignatius of Antioch)

33rd Sunday in Ord. Time (C)

ANG PAGTAPOS AMO ANG

KATUMANAN

“May isa ka pari nga “bombastic” nga nagsermon nahanungod sa katapusan sang kalibutan. “Magaanaw liwat,” siling niya. “Magalinog sang “intensity 15”, magakahulog ang mga bituon, magalupok ang adlaw… Magadulom ang tanan sa kalibutan!”, iya nga paandam. Dayon may isa ka bata nga ginkulbaan kag nagsiling sa amay niya: “Tay, kon matabu ang ginahambal ni pader, wala na sang klase sina noh?”

Kon kita gani makabati sang balita nahanungod sa Guerra, Linog, Peste, Bagyo, Gutom, ‘Tidal Waves’, kag iban pa nga kalamidad, madamu gid dayon nga mga “Propeta” ang nagapanagna nga malapit na gid lang maguba ang kalibutan. Pero aton tandaan nga ining mga kalamidad nagakatabu man taga-century halin pa sa tiempo ni Kristo. Ang mga pinakakulogmat natabu pa gani antes kay Kristo kag bisan wala pa nagakabuhi ang mga tawo.

Gani si Kristo naghatag sang mensahi: “Indi kamo magpalibog. Indi kamo magkahadluk. Indi kamo magpatalang. Magpakabakod kamo…” Ngaman? Tungod ang Dios amo ang nagauyat sang estorya sang kalibutan. Sya ang may control kag nakahibalo sang tanan. Sya ang sentro sang tanan. Ang mga kalamidad matabu gid man apang normal ini nga matabu kag wala nagakahulogan nga ang katapusan malapit na. Indi ini TANDA nga manugguba na ang kalibutan.

Buot silingon, ang importante amo ang SUBONG, kon ano ang aton ginahimo subong agud nga kon mag-abot gid man ang katapusan, handa kita sa pag-atubang sina. Gani yanda, ang Dios gid man bala ang sentro sang kabuhi ta? Nagapakalig-on gid man bala kita sa pagkabuhi suno sa gintudlo kag mga kasugoan niya?

Nagahilapit na nga matapos ang kalendaryo sang tuig Liturhiko sang Simbahan sa “Ordinaryo” nga Panahon, kag sa sini nga kaangtanan, ang mga balasahon sa aton selebrasyon nagapatuhoy sa tema sang “KATUMANAN”- FULFILLMENT, sang tanan nga mga butang.

Ang mga panagna nga “magunaw” ang kalibutan sa katapusan nga panahon ginahinambitan, INDI sa pagpahug sa aton sa mahanabo nga katulad sa sine nga “2012”, apang sa pag-angkon sang PAGLAUM kag KALIPAY nga ang tanan mabutangan na sang pagtapos, agud makasugud ang isa ka bag-o nga “panahon”.

Ini man nagapahanumdum sa aton nga ang tanan may katapusan… ang aton kalipay kag pag-antus, ang aton kadalag-an kag kapaslawan, ang aton mga kahapusan kag kabudlayan, ang aton maayong lawas kag kasablagan, kag ang tanan nga yari diri sa kalibutan.

Ginapahanumdum kita sang katapuk sang aton tawohanon nga mga kadalag-an kag naabutan. Ginapahanumdum kita nga indi kita ang nagapanag-iya sang aton umalagi nga kalibutan, sa bagay nga ang tanan nga aton gina-agyan sa sining dutang “luhaan”, isa lamang ka hulam sa aton Diyos nga Manunuga, kag sa Iya kaugalingon nga tini-on, sarang Niya mabawi ini tanan sa aton!

Sa sining tini-on nga nagahilapit na nga magtakup ang isa naman ka pagti-ug sang kalendaryo liruthiko sang Simbahan, kita gina-agda man sa pagtakup na sang aton daan nga kina-ugali agud makasugud kita sa pagbutang sing husto nga pagsugud sa pagkabuhi bilang matuod-tuod nga mga anak sang Diyos. Sa sini ginabutangan naton sang “pagsira” ang aton kinaugali nga nalugmok sa sala, agud “maka-abri” naman kita sa isa ka bag-o nga pagsugud!

Ini isa ka pagpamuklat sa aton nga kita dapat MAGMANGINHANDA sa tanan nga tinion sang aton kabuhi nga may mala-umon nga paghulat nga “nagapanaksi sa Maayong Balita”!

THE END IS NEAR

As an airplane is about to crash, a female passenger jumps up frantically and announces, "If I'm going to die, I want to die feeling like a woman."

She removes all her clothing and asks, "Is there someone on this plane who is man enough to make me feel like a woman?"

A man stands up, removes his shirt and says, "Here, iron this!".

FOOD FOR THOUGHT

“Great is the art of beginning, but greater is the art of ending.”( Lazurus Long)

BITS AND PIECES

-As long as there are tests, there will be prayer in  schools.

32nd Sunday in Ord. Time (C)

PAG-ABYANAY NGA WALA’Y

KATAPUSAN

Bag-o lang naton ginsaulog ang kapiestahan sang mga Santos kag sang aton mga pinalangga nga Nagtaliwan. Ining mga nagliligad nga mga inadlaw, nangin mga adlaw sang Kapiestahan para sa aton nga mga Katoliko. Ini tungud kita nga mga Katoliko nagatuo sa kabuhi nga wala sing katapusan ukon ang kabuhi sang PAGKABANHAW. Ang aton pagtuo, nagatudlo sa aton nga ang kamatayon sang aton nga lawas wala nagabutang sang pagtapos sang tanan sa aton kinabuhi, kundi nga ang kamatayon, isa lamang ka “alagyan” sa diin kita maga-ambit sang “kapupun-an” ukon “fullness” sang kabuhi! “ We share the fullness of life with God in His eternal kingdom. Amo ini ang “sekreto” nga ginpahayag sang aton Ginoo sa Iya mga pagpanudlo. Bisan gani sa Daan nga Kasugtanan sa Bibliya, ang pagkabanhaw, amat-amat nga ginpahangup sang mga personalidad nga katulad ni Jonas, nga nagpabilin sa sulod sang tiyan sang daku nga isda sa sulod sang tatlo ka adlaw kag tatlo ka gab-i. Ini nagapahayag lamang nga katulad sang aton Ginoo sa Iya nga pagkamatay, sang ikatatlo nga adlaw nabanhaw Siya sa isa ka mahimaya-on nga kabuhi.

Si San Pablo nagsiling nga subong nga kita nag-ambit sang kabuhi sang aton Ginoo paagi sa aton pagbaton sang sakramento sang bunyag, kita man maga-ambit sang Iya nga kamatayon kag pagkabanhaw. Diri maathag naton nga matalupangdan nga ang kapupun-an sang kabuhi wala nagatapos sa kamatayon kundi sa pagkabanhaw!

Amo gani nga ang aton mga minatay aton ginapapiestahan– isa ka malipayon nga selebrasyon, tungud kita nagatuo nga sila yara na sa kahjimtangan sang himaya kag kalipay nga wala sing katubtuban. Sila may yara yara na nga kahamungaya sang kabuhi tungud yara na sila sa sabak sang aton Amay sa langit.

Subong nga Domingo, nahamtang ang aton Ginuong Jesus sa isa ka sitwasyon sa diin Siya ginpamangkut nahanungud sa “kamatuoran” sang pagkabanhaw sang mga minatay. Ang sitwasyon nga may babayi nga ginpangasawa sang pito (7) ka mag-ululutod, isa ka daku nga palaligban, kon sa ulihi sila tanan mabanhaw. Kay sin-o bala siya nga asawa?

Matahum ang sabat sang aton Ginuo sa pagpahangup nga ang aton “painu-ino” sa sining kalibutan, tuman kalayo sa mga kamatuoran sa pihak nga kinabuhi! Sa kabuhi sang pagkabanhaw, wala na nagaluntad ang aton kaangtanan sang “paghigugma” nga aton diri gina-agihan sa dutang luhaan. Ang aton tawohanon nga paghigugma, ginabaylohan sang wala’y katapusan nga kaangtanan sang “pag-abyanay” nga amo ang SADSARAN sang tanan nga sahi sang  paghigugma! Ang aton nga paghigugma, bisan pa ang paghigugma sang mag-asawa, tubtub lang sa sining kalibutan! Sa pihak nga kinabuhi, sa gihapon ayhan magahigugma-anay man gihapon ang mag-asawa apang indi na bilang “mag-asawa”, kundi bilang mga ‘ABYAN”! Gani indi kita magdumdum nga sa gihapon “magahinaksanay” ang mag-asawa sa pihak nga kinabuhi… Ang aton lawas nagakadunut, kag kaupud sini ang aton mga hakus kag mga haluk ang amo ang pagpahayag sang aton tawohanon nga paghigugma.

Ang wala’y katapusan nga sadsaran sang paghigugma amo ang pagpakig-abyan, kag amo ini nga kaangtanan ang magapabilin sa wala’y katubtuban. Amo gani nga ang aton mga kabataan wala nagapabilin nga mga kabataan. Kon sila magmangin ginikanan na, naga-untat ang ila “pagkabata” sa mata sang ila ginikanan, kag sila nangin “abyan”!

Sa pihak nga kinabuhi kita nangin MAG-ALALABYAN– Didto wala’y katapusan ang kalipay! Ayawan kita pinangamusta sa aton mga abyan!

LIGHTER SIDE

THE HAPPY HUSBAND

During their silver anniversary, a wife reminded her husband: Do you remember when you proposed to me, I was so overwhelmed that I didn't talk for an hour?" The hubby replied: "Yes, honey, that was the happiest hour of my life."

FOOD FOR THOUGHT

“The most beautiful discovery true friends make is that they can grow separately without growing apart.” ( Elizabeth Foley)

31st Sunday in Ord. Time (C)

ANG KAAYO SA SULOD SANG

PAGKATAWO

May hulobaton nga nagasiling: “Every saint has a past and every sinner has a future.” Sang si Zaqueo gintawag ni Kristo kag ginhambalan nga SIya magakadto sa iya balay, piho nga sIya nahangawa gid kag nagsiling sa iya kaugalingon: “Sin-o? Ako? Segurado ka? Ako nga ginakabig nga makasasala sa sini nga duog kag sang mga tawo? Basi nagalahug-lahog ka lang?” Aton gid mabatyagan ang kalipay ni Zaqueo. Siguro, sa bug-os niya nga kabuhi, iya nabatyagan nga sya ginakaugtan sang tanan. Gani sa pagtawag sa iya ni Kristo kag sa pagmuno nga magakadto sa iya balay, iya nabatyagan nga siya espesyal kag may balor man gali. Halin sa “NOBODY”, siya nangin “SOMEBODY” sa isa ka ginataha nga Ginoo.

May mga tion nga amo man ina ang aton ginabatyag. Kon mabatyagan ta nga halos ang tanan kontra sa aton ukon daw wala sing may nagapalangga sa aton, aton nadiskubre nga may Dios nga nagapalangga kag nagaapin gid sa aton bisan magkanano pa. Kay para sa iya, kita indi lamang “ANYBODY”. Ang tagsa-tagsa sa aton espesyal sa iya. Ang tagsa-tagsa sa aton personal nga palangga gid niya.

Pareho kay Zaqueo, kita man mga maluya kag makasasala. Apang may Dios kita nga nagapalangga, nagabilib, nagahatag sa aton sang kahigayunan kag nagasalig gid nga ‘ang gago mangin gwapo’, ‘ang lagtok mangin lagting’, ‘ang makasasala nga tawo mangin santo’…

 Sa aton Ebanghelyo subong, natabo ang indi sang kinaandan sa aton adlaw-adlaw nga pagkabuhi. Ang “bisita” amo ang nag-agda sang iya kaugalingon nga magdayon sa balay sang isa ka tawo– si Zaqueo. Si Zaqueo indi lamang sang ordinaryo nga pumuluyo, kundi siya isa ka “pangulo” sang mga manugsukut sang buhis nga sadto anay sa panahon sang aton Ginuo, ginakabig nga “makasasala”!

Ang aton Ginuo ginakabig nga isa ka “propeta” sang Iya  nga mga kasimanwa, sa bagay nga daku nga palaligban para sa ila, nga Siya nga nakahibalo sang mga ginahimo sang mga tawo– nga wala sang may nalipud sa iya ihibalo, nagsaka sa balay sang isa ka makasasala!

Ano ang ligwat sini nga hitabo? Indi lamang nga ang aton Ginuo kag ang mga tawo ang nakahibalo sang sala ni Zaqueo, kundi bisan si Zaqueo mismo, nakahibalo sang iya kasal-anan. Siya nag-ako nga siya “nagdinaya”, apang handa siya sa pagbayad bisan pa tubtub sa apat ka pilo sang iya ginkawat!

Si Zaqueo handa sa pagtadlong sang iya “tiko’” nga pagkabuhi, tungud siya nakatalupangud sang iya nga kasaypanan! Wala siya “mag-rason” kon ngaman ginbuhat niya ang iya sala. Siya mapainubuson nganagbaton nga matuod siya nakasala, period!

Ang labing importante, nga bisan ang isa ka makasasala gina-agda man sa lamesa sang Ginuo, tungud nga luyag man sang Ginoo nga sila mangin bahin sang selebrasyon sang kabuhi paagi sa ila pagpanibag-o sang ila nga kaugalingon. Indi sang ulihi ang tanan para sa isa ka luyag magbag-o. Indi sang ulihi ang tanan sa isa ka nagabukas sang iya nga kaugalingon sa pagbaton sang pangagda sang aton ginoo sa pagdayon sa puluy-an sang aton nga tagipusu-on. Ang Ginoo luyag magpakigbahin sa aton kina-ugali.

Ang aton Ginuo nagpahayag sa katapusan sang Ebanghelyo sang Iya nga misyon, kag ini amo ang “pagpangita kag pagluwas sang nadula”.Wala ginalantaw sang aton Ginuo ang kabug-at sang sala nga aton nahimo ukon ginahimo pa asta subong. Sa baylo, ang Iya ginalantaw amo ang aton mapa-inubuson nga tagipusu-on kag kaugalingon nga bukas sa pagsugud sa pagtikang tuhoy sa PAGPANIBAG-O! Katulad ni Zaqueo, nagapangagda ang aton Ginuo sa aton! Bukas bala kita para sa Iya?

LIGHTER SIDE:

DON’T BRAG ABOUT IT!

Two women that are dog owners are arguing about which dog is smarter.... First Woman : "My dos is so smart, every morning he waits for the paper boy to come around and then he takes the newspaper and brings it to me. Second Woman : "I know..." First Woman : "How?" Second Woman : "My dog told me."

FOOD FOR THOUGHT

“Do you wish people to think well of you?

Don't speak well of yourself.”

( Blaise Pascal)