18th Sunday in Ordinary Time (B)

YOU ARE WHAT YOU EAT!

Suno sa mga “dietician” kon ano ang aton ginaka-on, amo man ina kita. May kaangtanan ini nga mga pulong sa aton Ebanghelyo subong nga Dominggo. Ang aton Ginuo nagasiling nga: “Indi kamo magpangabudlay tungud sa kalan-on nga nagakapan-os, kundi magpangabudlay kamo tungud sa kalan-on nga nagatener kag nagahatag sang kabuhi nga wala sing katapusan.”

Matuod nga nagakinahanglan ang aton “lawas” sang kalan-on agud ini mabuhi, apang ang lawasnon nga kalan-on nga iya ginakinahanglan sini amo ang kalan-on nga “nagakapan-os”… nagalipas lamang ini, kag wala sang kapahuwayan ang aton nga kagutum. Ang aton Ginuo nagahambal subong sang isa ka klase sang kalan-on nga sa diin ang mga tawo nagpangayo sini sa Iya agud ihatag sa ila. Amo ini ang kalan-on nga Iya ginahatag: “Ako amo ang tinapay sang kabuhi. Ang nagakari sa akon indi na gid paggutumon, kag ang nagatuo sa akon indi na gid pag-uhawon.” Buot silingon nga ang matuod-tuod nga kalan-on nga ginhatag sang aton Ginuo amo ang Iya KAUGALINGON nga lawas. Amo gani nga ginbilin Niya sa aton ang isa ka SAKRAMENTO, nga nagahatag indi lamang sang isa ka handumanan kundi sang Iya PADAYON nga presensya, nga sa tagsa naton ka pagsaulog sini, kita NAHIUSA sa Iya! Sa Santos nga Misa, ang aton Ginuo nagahatag sang Iya kaugalingon sa mga pulong: “Ini amo ang akon LAWAS… Ini amo ang akon DUGO!” Sa sini kita naga-ambit sang kabuhi nga wala sing katapusan nga Iya gintagna nga aton paga-ambitan. Kon kita nahiusa kay Kristo sa Santos nga Misa, kita man nangin KATULAD Niya… kita may kahigayunan sa pagbag-o sang aton kaugalingon. Nagapangabudlay bala kita para sa sini nga pagkaon? Ginapangita ta bala ang Ginharian sang Diyos, una  sa tanan? “Come and taste the goodness of the Lord!” Kon wala kita naga-upod sa Ginuo, paano naton matilawan ang Iya katam-is?

17th Sunday in Ordinary Time (B)

PAGMUAD...PAGPA-AMBITANAY

Ang isa sa mga pinaka “dramatic” nga milagro nga ginbuhat sang aton Ginuo amo ang pagpamu-ad sang lima ka bilog nga tinapay nga sebada kag duha ka bilog nga mga isda, nga nagdamo kag nakapaka-on sang lima ka libo nga mga lalaki, wala labut ang mga babayi kag mga kabataan.

Madamo sang mga interpretasyon ang mga batikan nga mga “scholars” sini. Ang isa sang akon nanami-an, amo nga sadto anay, kon magpanglakaton ang mga tawo, nagabalon sila sang pagka-on nga ila ginasulud sa ila mga “back-packs”. Ini tungud kay wala pa sang mga salakyan sadtong una, kag sigurado gid nga ang ila pagpanglakaton nagadugay sang mga inadlaw. Sa ila nga pagsunud sa aton Ginuo sa malawig nga tini-on, ayhan “naubos” na ang ila nga balon. “Naubos” sa punto nga wala na sang “extra” nga nabilin para sa ila ingkaso nga maglawig pa ang mga inadlaw kag pagpanglakaton. Amo gani nga bisan may “ara” pa nga diutay nga nabilin, naghambal sila nga WALA na! Sa pagkamatu-od, “gintipid” nila ang ila nga balon… gintago lang nila ini agud makapanigurado sila nga indi sila MAWAD-AN.

Apang sang may isa ka bata nga nagbukas sang iya nga balunan kag naghatag sang iya “ginasupot-supot” nga balon, kag nagtunghol sini sa mga apostoles, kag sang makita sang iban ang ginbuhat sang bata, nahuya sila sa ila kaugalingon, kag nagsugud man sila sa pagbukas sang ila balunan. Diri nagsugud ang pagpa-ambitanay sang ila balon nga NAGSULOLOBRA pa gani! Amo sini ang mahimo sang PAGPA-AMBITANAY– WALA SANG MAY MAGUTUMAN!... WALA SANG MAY MAKULANGAN!  Kita? Ano ang aton ginpa-ambit sa isa kag isa?

16th Sunday in Ordinary Time (B)

MAKALULU-OY NGA PANONG

   Ang mga karnero ginakabig sa isa sa mga pinakamabu-ot sa mga kasapatan. Ini tungud ang kinatuhay sang mga karnero nagapakita nga wala gid sila sang inugsagang o inugbato sa ila kaugalingon– wala sila sang matalum nga mga kuko, wala sang bangkil kag sungay, kag iban pa nga masiling naton nga ila nga taming kon sila gus-abon sang iban nga mabangis nga mga kasapatan. Amo gani nga ang mga karnero nagakinahanglan gid sang “manugbantay” agud nga sila mapangapinan sa tion sang mga kapipit-an. Kon wala sila sang manugbantay, ukon kon uyaya ang manugbantay, ang mga karnero magatalalang kag madali sila mangin biktima sang mga luyag mamintaha sa ila.

   Amo ini ang sitwasyon sang mga tawo sang panahon sang aton Ginuo, kag bisan pa gani siguro sa aton man nga panahon. May yara matu-od nga mga “manugbantay” nga natalana sa ila, apang imbes nga sila bantayan pakadto sa maayo nga halalban, ukon sa mga luyag mamintaha sa ila, sila ginapangunyadi-an lamang sang mga yara sa otoridad. Madamo nga mga ginakabig nga mga “manunudlo” sang kasugu-an apang imbes nga sila magpamag-an sang palas-anon sang mga tawo, ginapabug-at pa gani nila ini!

   Masakit ini nga palanan-awon sa aton Ginuo tungud Siya isa man ka Manugbantay kag sinsero sa Iya nga misyon, sa bagay nga Siya “ginsubu-an” gid sang Iya makita ang “panong” nga nagapangita sang kasanag kag pagtuy-toy sang isa ka Maayo nga Manugbantay. Ang aton bala pagkabuhi “nasandig” sa Iya?   

15th Sunday in Ordinary time (B)

ANG AWTORIDAD KAG PAG-ALAGAD

Bilang pagpasakup sa misyon sang aton Ginuo, ang mga gintutun-an gihatagan man sang “awtoridad” sang aton Ginuo sa pagtabug sang mga malain nga espiritu kag sa pag-ayo sang mga masakiton… bisan pa gani sa pagbanhaw sang mga patay. Nahibalu-an sang aton Ginuo nga may katapusan gid ang Iya nga misyon sa sining dutang luhaan, sa bagay, nga ining pagpa-ambit sang Iya nga misyon, nagakahulugan lamang nga DAPAT ini PADAYUNON tubtub sa katubtuban.

Apang indi katulad sang tawohanon nga awtoridad, nga amo ang pag-gahum sa pakusug nga pamaagi, ini nga awtoridad nabase sa sadsaran sang PAG-ALAGAD nga wala nagapanumdum sang makina-ugalingon nga pagpamintaha. Ini nga kabuhi sang isa ka gintutun-an, isa ka kabuhi sang PAGSAKRIPISYO: “Indi kamo magdala sang bisan ano magluwas lamang sang sungkod, wala sang kwarta ukon mga suludlan, isa lang ka sandalyas kag bayu…” Ini nagapatima-an lamang nga magluwas sa kinahanglanon, ang iban nga mga dalalhon pabug-at lamang sa isa ka gintutun-an nga nagadala sang Maayong Balita. Isa ini ka kabuhi nga nagahangkat sa tagsa-tagsa sa pagsakripisyo kag sa pagkalimut sa kaugalingon nga mga kinahanglanon agud WALA SANG MAGA-UPANG sa paglapnag sang Maayong Balita.

Matahum nga usisa-on naton ang aton kaugalingon bilang mga gintutun-an sang aton Ginuo. Ano bala ang mga naga-upang sa aton pag-alagad sa Iya? Ano ang aton ginsakripisyo agud mabantala sang Maayong Balita ?

14th Sunday in Ordinary Time (B)

BULAG SA KAAYOHAN

  Isa sa mga pinakamasakit nga eksperyensya sang tawo amo ang di-pagpati sang iya mga binuhatan sang mga tawo nga pinaka-suod sa iya!- Mga abyan, paryente kag mga kakilala! Sa aton eksperyensya, mas maayo pa gani ang “iban” nga mga tawo, daw mahapus pa maka-intyende kag makapati sang sa ginakabig naton nga mga malapit sa aton. Ang mga kano may hambalanon sini: “Familiarity breeds contempt!” Tungud sa imo pagkilala sa tawo, nga ayhan tama kalapit, nangin ordinaryo na lamang siya sa imo panan-awan, kag yadtong sang una nga ginakabig mo nga daw katingalahan sa iya ginabuhat, karon nangin isa na lamang ka ordinaryo nga buluhaton. Ang sadtong una nga daw “misteryo” para sa imo, nangin isa na lamang ka simple nga kamatuoran!

   Masami ini nagakahanabo sa mga mag-asawa. Sang una, sang nagaluyagay pa lang sila, ginahanda-an ang tanan… pinakahamut nga perfume… pinakamanami nga bayo ukon pantalon… pinakamanami nga okasyon– bisan pa gani ang “anniversaries” ginpadasig kag ginihimo na nga “month-sary”… pinakamanami nga regalo, kag iban pa. Apang sang nag-asawahay na sila, sus! indi na gani kadumdum sang anniversary, pirmi na lang mabaho, ang mga bayo nga ginasuksuk sa sulud sang panimalay amo ang mga yat-yat kag mga gisi-gisi, tungud kay tutal, “asawa ko manlang siya!” Nangin ordinaryo na nga palanan-awon ang isa ka asawa sa sulod sang panimalay! Nadula na ang “magic!”

   Amo man ini ang natabo sa aton Ginuo sa atubang sang Iya mga kasimanwa. Ano bala Siya para sa aton?