GOOD FRIDAY (ABC)

GOOD FRIDAY

YARI ANG INYO HARI!... Amo ini ang ginsiling ni Pilato sa mga Hudiyo… amo ini ang panumbungon sa aton Ginoo subong- ang nagapakahari kaaway sang Emperador!

YARI ANG INYO HARI- hari nga ang Iya ginahamtangan amo ang KRUS… ang Iya korona amo ang mga TUNOK… ang Iya pamakud amo ang mga LANSANG nga nagadulot sa Iya mga kamut kag mga tiil… ang gin-adorno sa Iya amo ang Iya kaugalingon nga mga samad kag mga dugo!... ang Iya pag-alagad, ginsiliyuhan sang PAGHALAD NIYA SANG IYA KABUHI! Kabaliskaran ini nga laragway sang isa ka hari nga aton nahibaluan! Sa aton panglanataw, dapat ang hari may gahum… sya dapat manggaranon… sya dapat alagaran… sya dapat ginahatagan sing pagrespeto. Apang ano ang natabo subong kay Jesus? Hari… apang ginyaguta, ginpasipalahan, gindupla-an, ginpasakitan, ginkondenar, kag ginlansangan sa Krus, kag nabugtuan sya sang ginhawa nga wala pa makapahuway ang mga tawo sa pagpasipala kag pagyaguta sa Iya.

Ngaman nga amo gid ini ang gin-agihan sang aton Ginoo? Daw indi man sing patas? Daw sobra naman nga inhustisya ang Iya ginbatas? Sobra man ya ka sapat-sapaton ang ginpahakwat sa Iya nga mabug-at nga Krus kag sang sahi sang kamatayon nga ginpamatbat sa Iya? Ngaman amo gid ini nga sahi sang kamatayon?... amat-amat tubtub nga Sya mabugtu-an sang ginhawa?

Utod nakatalupangud ka bala? Ina tanan tungud sa imo… tungud sa akon… kag tungud sa aton tanan! Huo subong gid nga tion GIN-PAILIG SANG ATON GINOO ANG IYA NGA DUGO AGUD KITA MATINLU-AN kag agud nga ibalik ang aton na-utod nga kaangtanan sa aton Amay sa langit. Amo kita sini Niya ka palangga- sa sini ang tagsa-tagsa sa aton GINPRESYOHAN SANG MAHAL… sa sini gin-uli sa aton ang aton nadula nga dignidad, nga kita MGA ANAK SANG DIOS!

Natabo ang natabo na. Wala na kita sing mahimo pa sa pagbaylo sang istorya sang aton kaluwasan. Apang sa karon nga tion, kita gid lang makapangamuyo kag makatalupangud sang aton mga kakulangan kag kasal-anan. Sa subong nga tion makapangamuyo gid lang kita sing subong sini: (Palihug mag-upod kamo sa akon sa sini nga pangamuyo)

Hesus, amo naman ini ang isa ka tini-on sang amon mga tinuig- ANG SEMANA SANTA. Nagbakas man ako nga makapasakup sa mga buluhaton sini nga semana. Nagkumpisar ako sang akon mga sala sa pari, kag nagpatulo man gani ako sang akon mga luha sa pagtalupangud sang akon kasal-anan. Nabatyagan ko ang kasakit kag kamatayon nga Imo ginbatas. Nahuya gani ako kay WALA GID AKO SING MAY NABULIG SA IMO.

Si San Pedro nagpanghiwala sa imo, suno sa Imo panagna… kag nahibaluan Mo man nga masami ko Ikaw ginpanghiwala ilabi na gid sa akon pagpabulag-bulag kag pabungol-bungol sa imo panawag sa pagpatawad, paghangup, kag paghigugma. Masami ginpanghiwala ko ikaw tungud sa akon bugal! Ginoo, patawara ako sa sini nga mga kakulangan katulad ni San Pedro.

Ang Imo pagpas-an sang Krus sa diin Ikaw nadagpa sang makapila ka beses, tungud ang Krus, nagabug-at nga nagabug-at sa Imo pagpadayon sa paglakat, kag tungud sang padayon nga paghampak sa Imo likud kag lawas, sa gihapon wala ka mag-untat agud malab-ut ang kalbaryo, nagabutang sa ini akon sa isa ka sitwasyon nga MAKAHULUYA. Ako ya REKLAMADOR! May problema gani kay tatay, kay nanay, sa akon mga kautoran, sa akon mga abyan, sa akon trabaho…reklamo dayon… ginabuy-an ko dayon ang akon Krus! Wala pa gali gani ini sa KAMALINGKING sang Imo gin-agyan. Ginoo, patawa ako kay padayon ako nga NAGPABUG-AT sang imo ginpas-an nga Krus.

Huo Ginoo, Biernes Santo na, kag yari naman ako- ang Imo makasasala nga anak. Nahibaluan ko nga pirme ko lang Ikaw ginakalimtan sa tion nga MAHAMUNGAYA AKO, apang ang Imo ginbuhat subong nagapahanumdum sa akon nga indi gid ako madalman sa akon tawohanon nga pangalipayan. Salamat Ginoo sa Imo PAGPAHANUMDUM. Salamat sa Imo padayon nga PAAGBANTAY SA AKON. Nahibaluan ko nga makapamag-an sa Imo ginapas-an kon ako magbuhat sing maayo nga mga buluhaton… kon pirme ako nga magpangamuyo… kon pirme ako magduaw sa Imo sa Simbahan… kon pirme ko Ikaw kaupod sa Santos nga Misa… kon magpa-ubos ako sa pagpangayo sang kapatawaran sa pagkumpisar… kag kon magbaton ako sa Imo sa Santos nga Pagkalawat. Ginoo, ayhan indi ko ini mapromisa sa Imo tanan, apang subong, akon ginapangamuyo… INDI MAN AKO PAGBUY-I KAG INDI  AKO PAGSIKWAYA. Katulad sa makawat sa imo tuo, ako makasiling gid lang: “GINOO, DUMDUMA MAN AKO KON YARA KA NA SA IMO GINHARI-AN!” Patawara ako Ginoo… magabakas gid ako sa paglakat sa dalan sang pagpanibag-o!