4th Sunday of Lent (B)- March 15, 2015

4^th Sunday of Lent (Jn 3: 14-21)

ANG HINIGUGMA NGA GINHALAD

   Samtang nagahilapit na ang Semana Santa, ginhatagan naton sing pagtamod ang pag-antus ni Jesus. Sia nagpanagna tuhoy sini. Subong nga si Moises nagbayaw sang man-og nga saway sa tukon didto sa desierto, Sia man pagabayawon sa Krus.

  Suno sa aton Ginuo, ini nga paghalad Iya nga pagabuhaton tungod sang Iya paghigugma sa Amay kag sa bug-os nga katawhan. Paagi sini “ang tagsa-tagsa nga nagatuo sa Iya indi na mapatay, kundi may kabuhi nga wala sing katapusan.”

  Ini nga sakripisyo nga pagabuhaton sang aton nga Ginuo isa ka pagtuman sang pagbuot sang Amay– ang pinalangga kag Bugtong nga Anak– para sa kaluwasan sang kalibutan.

  Ang paghalad nga ini sang langitnon nga Amay nagapahanumdum sa aton sang isa pa ka amay: Si Abraham. Sa iya katigulangon, si Abraham ginhatagan sang Dios sang isa ka matuod nga manunubli– si Isaac nga iya anak kay Sara, nga amo ang magadala sang iya ngalan. Apang ginpangayo sang Dios sa iya si Isaac- “ihalad mo siya bilang sinunog nga halad!” Abaw kasakit man sini! Nagadugo ang kasing-kasing ni Abraham, apang wala niya gindumili ang iya anak sa Diyos. Siya nagtuman… siya nagmasinulundon!

  Ginpungggan sang Dios si Abraham sang makita niya ang katutum ni Abraham, apang wala Niya ginpunggan ang paghalad sang Iya Anak tungud sang Iya nga paghigugma sa aton. Amo kita sini KAMAHAL sa mata sang Diyos!

5th Sunday of Lent (B)- Mar. 22, 2015

5^th Sunday of Lent (Jn 12: 20-33)

NAG-ABUT NA ANG TION!

Malapit na gid lang maga-abut ang katumanan sang Misyon sang aton Ginuo– ang pag-usik sang Iya kaugalingon nga kabuhi bilang kabayaran sa kasal-anan nga ginbuhat sang katawhan nga nag-abusar sa paghigugma nga ginpa-ambit sang Iyang Amay.

Sa Ebanghelyo karon nga Dominggo maathag nga ginsiling sang aton Ginuo nga: “Ang isa ka binhi sang humay indi magdamo kon indi ini pag-ipanggas sa duta kag mapatay.” Ginapahayag sang aton Ginuo nga KINAHANGLANON gid nga “madula” Niya ang Iyang kabuhi agud kita MAKAANGKON sang isa ka BAG-O nga kina-ugali sa atubangan sang aton Amay sa langit.

Makatalanghaga… Makatilingala...kag ayhan masiling naton nga “UNFAIR” man para sa isa ka tawo nga magpakamatay agud maluwas ang iban. Kon aton lantawon sa hustisya, daw indi gid sang makatarungan nga ang aton Ginuo maghalad sang Iyang kabuhi tungud lamang sa aton mga sala. Apang ang pama-agi sang Diyos indi katulad sang pama-agi sang tawo. Ang hustisya sang Diyos malayo sang sa hustisya sang tawo, tungud ang hustisya sang Diyos wala ginabase sa talaksan tungud INDI ini MATAKUS! - kay ang hustisya sang Diyos ginabayaw sang Iya nga LAYI SANG PAGHIGUGMA–Paghigugma nga wala sang talaksan… wala sang tupong… wala sang katapusan… tungud ang aton Diyos, Diyos sang PAGHIGUGMA!

Ang paghigugma ni Jesus wala nagapa-abut sang balos Amo man ini nga paghigugma ang Iya ginapabuhat sa aton! Naga-upod bala kita sa aton Ginuo sa Iya dalan?

3rd Sunday of Lent (B)- March 8, 2015

3^rd Sunday of Lent (Jn 2: 13-25)

TEMPLO VS MERKADO

“Indi ninyo paghimu-a nga balaligyaan ang balay sang akon Amay!” Amo ini ang mga pulong sang aton Ginuo sang Iya ginpamaliskad ang baligyaan sang mga manugbaligya sa sulud sang templo. Tuman gid kataas ang pagtahud nga ginhatag sang aton Ginuo sa Templo tungud ini amo ang puluy-an sang Iya nga Amay. Ang Templo ukon ang Simbahan, sa aton karon naandan nga pagtawag sa sini, isa ka du-og sa diin nagasumalang ang katawhan sa paghiusa sa Diyos nga iya Tagtuga. Diri sa sulud sang Simbahan, ginahimo naton ang pagpakig-angut sa Diyos nga labing Balaan sa tanan… ini nga pagpakig-angut indi matumbasan sang kwarta ukon sang ano man nga material nga mga bagay.

Ang Simbahan indi sang merkado! Sa merkado, ang tanan sarang mo maangkon kon ikaw may kwarta, kay ang tanan nga ginabaligya, ginapresyohan! Sa merkado, may katumbas ang ginabaligya! Ang merkado madamo sang higko tungud ang manugbakal kag manugbaligya nagakalhit lang bisan diin, bisan pa may ara na gid nga basurahan! Ang importante sa merkado nga may nagakahanabo nga transaksyon nga ginatumbasan sang bayad!

Sa panahon sang aton Ginuo, kina-andan sa mga komersyante ang magbaligya sa templo tungud ini ginagamit nila sa ila paghalad sa Diyos, ang diperensya lang nga sa ila nga pagbaligya sang halad, nalipatan na nila ang GINAHALADAN NGA DIYOS kag gani, nadula man ang pagrespeto kag pagtahud sa Balaan nga Duog!

May pagrespeto man bala kita sa Balay sang Diyos?

2nd Sunday of Lent (B)- March 1, 2015

2^nd Sunday of Lent (Mk 9: 2-10)

KAPASLAWAN… KADALAG-AN

   Kanami na sang pamatyagan sang mga apostoles sang sila padayon nga nagasunod sa aton Ginuo. Sikat na sila! Bisan diin sila magkadto, gina-apungan sila sang mga tawo. May gahum man sila sa pagpang-ayo kag pagtabog sang mga malain nga espiritu, bisan pa kon kaisa, kulang-kulang pa ang ila nga pagtuo. Apang bisan pa sa mga sitwasyon nga subong sina, wala gid sila nahadlukan kay yara dayon ang ila nga “hero”- ang aton Ginuong Jesus.

  Sing wala pagduhaduha, ang  mga apostoles “maisog” tungud sila nagapati nga ang aton Ginuo, amo na ang Makagagahum nga magahilway sa ila sa ila pagka-ulipon sa diin, ila ginapahamtang ang ila paglaum nga maangkon ang ila “pagdaug” sa mga nagapigos sa ila!

  Daw ano ayhan ang ila pagkapaslaw sang ila mabatian ang aton Ginuo nga nagapanagna nga Siya magabalik sa Jerusalem agud mag-antus, mapatay, kag mabanhaw! Huh! Para sa ila, indi ini nagakabagay para sa aton Ginuo kag indi man ini mahangpan sang ila “manubo” nga painu-ino– ano nga kamatayon? Ano nga pagkabanhaw?

  Agud maka-”sid-ing” sila sa ginapangako nga kabanhawan sa likod sang kamatayon, sila karon ginpakita-an sang ginapa-abut nga himaya nga ila man sa ulihi pagapakig-ambitan.

  Ginasiling sang mga eksperto sa bibliya, nga ang hitabo sang PAGBAG-O SANG DAGWAY ni Kristo, nagapahayag sang isa ka daku nga PAGLAUM, nga sa likod sang tanan nga mga pag-antus nga mga pagtilaw sa kabuhi, may KADALAG-AN nga nagahulat sa tagsa-tagsa. Indi kita magdula sang paglaum!

1st Sunday of Lent (Mk 1: 12-15)- Feb. 22, 2015

PAGPANIBAG-O KAG PAGPAUBOS!

  Sa aton pagsugud sang Domingo sang Kwaresma, kita ginapanawagan sang aton Ginuo sa pagtadlong sang aton tiko nga pangabuhi sang pagpakasala, kag sa pagpati sa Maayong Balita.

  Ini amo ang maathag nga mensahe sang aton Ginuo sa Iya nga ministeryo publiko. Ang Maayong Balita nga Iya nga ginadala amo ang Maayong Balita sa PAGPAHAULI  sang nabuong ukon naguba nga kaangtanan sang tawo sa iya nga Dios kag sa iya isigkatawo.

  Para sa aton Ginuo, may KAHIGAYUNAN ang tanan sa pagbalay sang isa ka maayo nga pagtamdanay, kag siya mangin bug-os liwat bilang isa ka tinuga suno sa laragway sang Iya Manunuga.

  Ang PAGSUGUD liwat indi sang mahapos nga buluhaton. Nagakahulugan ini sang PAGKAMATUTUM sa aton nga desisyon sa PAGPANIBAG-O. Madamo nga mga PAGSULAY ang aton atubangon nga sarang makaganyat sa aton sa “pagbalik” sa aton nagliligad sa diin kita “mas kumportable” ukon para sa aton “mas mahapos” nga pangabuhi.

  Katulad sa aton Ebanghelyo, ginpakita nga ang aton Ginuo ginpakadto sang Espiritu sa desierto, sa diin Siya ginsulay ni Satanas. Sa sini man, ginpakita nga ang aton Ginuo nangin madinalag-on tungud pagkatapos sang pagsulay, Siya nagbantala dayon sang Maayong Balita sa Galilea.

  Paano si Jesus nangin madinalag-on? Paagi sa Iya pagpabilin nga MAPAINUBUSON NGA MASINULUNDON sa binubuot sang Iya nga Amay. Bisan pa tubtub sa Krus, si Jesus padayon nga ginsulay, apang Siya wala gid nagpa-ibabaw sa kabubut-on sang Iya Amay.

  Ang himaya nga matuod maangkon lamang paagi sa dalan sang PAGPAUBOS!

6th Sunday in Ord. Time (B)

6^th Sunday in Ord. Time (B) – Feb. 15, 2015

(Mk. 1: 40-45)

“May isa ka aruon nga nagpalapit kay Jesus, nagluhod sa Iya atubangan, kag nagpangayo sing bulig.”

BAG-O NGA KABUHI KAY JESUS

  Sang panahon ni Jesus, ang mga aruon ginalikawan sang tanan. Ang mga aruon nagapahilayo sa katilingban, kag kon sila may masumalang, nagapaandam sila paagi sa pagsinggit: “Di-matinlo ako, di-matinlo ako!” (Nahauna nga Balasahon).
  Ang aru nagikan sa Griego nga tinaga “leptein”, nga ang buot silingon, “nagakahulog ang panit.” Mga sahi ini sang katol. Indi ini sang “Hansens’s disease” sa panahon subong kag indi tanan nga katol makalalaton! Apang ginakangil-aran ang aru tungud “ginahigkuan” sini ang tawo kag gindumilian sa pagsimba sa Dios sa sinagoga ukon templo. Ang pari lamang ang makadesisyon kon nag-ayo na ang tawo sa sini nga balatian.
  Tungud ginhimulag ang tawo sa iya pamilya kag ka-kilala, kag indi siya makapalapit sa pagsimba sa Dios, ginakabig siya nga “patay” bisan pa nga buhi pa siya. Gani ang pag-ayo sa aru daw isa ka”pagkabanhaw” sa minatay– kag ang Dios lamang ang makahimo sini. (Num 12: 10-12; 2 Hari 5: 7)
  Ang aru simbolo sang kasal-anan. Katulad sang isa ka aruon nga nagluhod sa atubangan ni Jesus agud siya ayuhon, kita man nagaluhod sa kumpesyonaryo agud makabaton sang patawad. Kag ginahatag sa aton ang absolusyon. Paagi sa ministeryo sang Simbahan, ginahatag sa aton sang Dios ang Iya patawad, paghidait, kag bag-o nga kabuhi!

  Ayhan wala kita sang aru nga makita sa aton mga panit, apang sa sulod sang aton matuod nga pagkatawo, nagaka-mi-mi ukon nagakatiphag na ang aton kalag sa pagpakasala. Magluhod kita sa atubangan ni Jesus kag magbaton sang bag-o nga kabuhi!

5th Sunday Ord. Time (B)

5^th Sunday in Ord. Time (B) – Feb. 8, 2015

(Mk. 1: 29-39)

“Ginpalapitan sia ni Jesus,  gin-uyatan sa kamot kag ginpabangon. Nag-ayo sia sa gilayon kag nag-amuma sa ila.”

  Indi gid malikawan angpagka-pamoso sang aton Ginoo sang Sia nagalibut sa mga banwa sang Israel.-GINAPANGITA Sia sang halos tanan nga mga tawo tungud sang mga pagpang-ayo nga iya ginahatag sa mga tawo nga may mga kasablagan, bisan pa ang pagtabug sang mga malain nga mga espiritu. Sa pagkadamo gid sang mga katingalahan nga ginbuhat ang aton Ginoo sa bagay nga bisan diin man Sia magkadto, “gina-apungan” Sia sang mga tawo.

Sang panahon sang aton Ginoo, madamo man sang mga manugbulong (mga doktor), katulad man sa aton nga panahon subong. Apang ngaman nga ang mga tawo, imbes nga magkadto sa mga manugbulong, nagakadto sa Iya? Amo ini ang ginapahayag subong sang aton Ebanghelyo. Ginsugiran kita ni San  Markos sa Ebanghelyo nga sang nagkadto si Jesus sa balay ni Pedro, naabtan nila nga may hilanat ang ugangan nga babayi ni Pedro, kag ginpalapitan sia sang aton Ginoo kag GIN-UYATAN sa kamot kag ginpabangon, kag nag-ayo sia sa gilayon kag nag-amuma sa ila! Amo man siguro sini ang ginbuhat sang aton Ginoo sa iban pa nga Iya nga ginpang-ayo, sa tagsa ka mga masakiton nga Iya masumalang. Nagalutaw gid ang elemento sang PAGTANDUG sang aton Ginoo sa tagsa ka tawo nga Iya masumalang. Diri ang kinalain sang mga manugbulong sa pagpang-ayo sang aton nga Ginoo. Ang mga manugbulong, nagabulong sang kasablagan ukon sakit, apang ang aton Ginoo, nagabulong sang BUG-OS NGA TAWO.

  May isa ka pasyente nga nagreklamo sa isa ka doktor, “Doktor, siling niya: Ngaman nga ang inyo pirmi lang nga ginahambal amo ang parti sa akon sakit? Ngaman wala kamo gapamangkut kon nano ang amon BALATYAGON nahanungud sa sakit?”. Ayhan ini nga pamangkut indi lamang para sa mga doktor, kundi para man sa aton tanan. Masami nagabulig kita sa mga nagakinahanglan, sa mga nagamasakit, sa mga ginagutum, sa mga ginhalitan, ukon sa mga wala-wala, apang sa masami aton lamang ginatalupangud ang ila mga kakulangan sa materyal nga mga bagay, apang wala naton ginatalupangud ang kabug-osan sang iya nga pagkatawo.

  Ayhan manami nga dal-on ang mga “street children” sa Island Cove sa Pampangga, sang pag-abut sang Santo Papa, agud nga ‘makatilaw’ man sila sang masulhay nga pangabuhi, nga wala sila sa kalye, apang isa lamang ini ka paghatag sang sayup nga paglaum (false hope) kon pagkatapos sang kasulhay didto sa Island Cove, mabalik man lang sila sa kalye nga padayon nga magapuyo didto… mangalimos, magpang-ukay sang mga basura sa pagpangita sang pagkaon kag pangabuy-anan, magtugyan sang ila mga kaugalingon sa kamut sang mga sindikato, kag iban pa.

  Ang aton Ginoo nagpakita subong kon ano ang matuod nga pag-ayo sa aton. Katulad sang ugangan nga babayi ni Pedro nga Iya gintandug, ini nga aksyon  sang aton Ginoo, amo ang naghatag sa iya sa pagtalupangud sang PAGPAKIGBAHIN KAG PAGHIUSA sang Dios sa iya nga balatyagon, kag nagtulod sa iya sa pagbangon kag sa pag-amuma sa ila. Amo ini ang matuod nga KAHILWAYAN. Sa pag-ayo sang aton mga sakit kag kasablagan, kita dapat may pagtalupangud nga sarang kita makalakat liwat sang isa ka bag-o nga pagpanglakaton tuhoy sa mas maayo nga pagkatawo, kag indi magpabilin sa aton daan nga ‘malaba-ab’ nga pagkabuhi!

  Ginatulok naton subong ang aton Ginoo. Kita ang nagapadayon sang Iya gin-umpisahan. Indi gid ma-question aton pagkamabinuligon, apang sa aton pagbulig, ginahaw-as gid bala naton ang aton ginabuligan sa iya kahimtangan agud makabutwa sia kag makasugod sa isa ka bag-o nga pagkabuhi kag pagpanglakaton? Amo ini ang sahi sang pagtandug nga aton dapat ipalab-ut sa aton mga utod nga nagakinahanglan- may pagpanibag-o.