6th Sunday of Easter (A)

PAGHIGUGMA KAG PAGTUMAN

    Nagapadayon ang “diskurso” sang aton Ginuong Jesus nahanungud sa Iya kasuguan sang PAGHIGUGMA. Isa ka semana antes naton pagasaulugon ang “Pagkayab” Niya– ang Iya nga pagbalik sa Iya nga Amay sa Ginharian sang langit, Siya nagapahayag sang ginatumud Niya nga kasuguan sang paghigugma– Ini nga paghigugma makita sa pagpabilin nga MATUTOM sa PAGTUMAN sang Iya mga sugo, tungud ang Iya mga sugo amo man ang sugo sang aton Amay sa langit. Ang paghigugma nga Iya ginatumud makita naton sa Iya nga paghi-usa sa Iya nga Amay nga ginasilyohan sang kabakud sang isa ka Mananabang nga amo ang Espiritu Santo.

  Amo gani nga Siya magabalik sa Iya nga Amay agud pangayuon Niya ang paghatag sa Iya mga gintutun-an sang ila kabakud kag kapag-on sa dulut sang Espiritu Santo.

  Sa sini nga mga pulong sang aton Ginuo, aton matalupangdan nga ang ginatumud Niya nga paghigugma, nagadulut sang PAGHI-USA– paghi-usa sang mga personas… paghi-usa sang panghuna-huna… sang tinutuyo… sang balatyagon. Sa malip-ot nga pulong ang kahulugan sang paghigugma amo ang     PAGTINGUB sang kabug-osan sang tagsa ka katapo!

  “Love unites. It builds communities of persons!” Amo gani nga ginasiling sang aton Ginuo sa aton Ebanghelyo subong nga “kon ginahigugma ninyo Ako, tumanon ninyo ang Akon mga sugo. Pangayuon ko sa Amay nga hatagan Niya kamo sang isa ka Mananabang, ang Espiritu sang kamatuoran, nga magapabilinupod sa inyo sa walay katapusan.”

  Ano bala nga sahi sang paghigugma ang nagaluntad sa aton tunga? Ini bala paghigugma nga nagapahiusa sang aton panghuna-huna kag balatyagon, o nagapahamulag sa aton sa aton kaangtanan sa sia kag isa?

                                                                FR. RONNIE

FOOD FOR THOUGHT

“There is always something left to love. And if you haven't learned that, you haven't learned                nothing.” (Lorraine Hansberry)