Year of Ecumenism and
Interreligious Dialogue
Dec. 16, 2019, (1st Day):
“May isa ka bata nga nag-upod kay
nanay niya sa grocery kay nagpamakal sila sang ila mga kinahanglanon. Sang
pab-abut nila sa counter, ginkambyohan sing sobra ang nanay kag nakita sang
bata nga sobra ang ginbaylo, kag naghutik siya sa iya nanay nga nagasiling,
‘nay daw sobra man ang aton baylo?’. Si nanay niya nagsabat,’Bay-i lang da
anak, indi ta lang pag-iuli ang sobra kay ginahimo man na ini sang iban’. Gani
nagpaukoy na lang ang bata. Isa ka adlaw nag-upod ang bata sa iya tatay nga
nagasakay sa ila kotse, kag ginbusinahan kag ginlagas siya sing highway patrol
kay nag-overspeeding siya. Sang nagpundo siya, ginpangayo sang highway patrol
ang iya lisensya, kag sang nagku-ot siya sang iya lisensya, gin-apiran niya
sing 500 ka pesos kag gintunghol sa highway patrol. Nakita ini sang bata kay
nagreklamo sa iya tatay: ‘tay, daw gin-apiran mo man sing kwarta imo lisensya?’
kag ang tatay nagsabat: ‘Bay-i lang da nak, amo na ang ginatawag nga lagay’ kag
nakalakat ang amay nga wala na ka-violate sang traffic rules. Sang nagdaku ang
bata, naka-obra siya sa ginabaligyaan sang mga kamatis. Ang iya ginahimo,
ginabutang niya ang mga dunot sa idalum sing kaing kag ang mga maayo, sa
ibabaw. Nakita ini sang iya manager kag gindayaw siya tungud manami ang iya
gina-obra, siling sang manager ‘very good gid anak, kay dali magmanggaranon ang
kompanya sa imo’. Nagdaku pa gid siya kag nagbigtime na ang iya pagpangawat.
Nadakpan siya nga nagpangawat sa isa ka balay sang mga kagamitan, kag nadakup
siya sang mga pulis kag ginbutang sa prisohan. Sang pagkabalo sang mga
ginikanan, naakig gid sila kag dali-dali sila nga nagkadto sa presinto. Sang
pagkakita nila sa ila bata, gulpi nga nagsiling ang nanay: ‘sin-o ang nagtudlo
sa imo mangawat? Husto gid lang ang amon ginatudlo sa imo ni tatay mo kag? Kag
ang bata nagsabat: ‘indi bala kamo nay, tay, natun-an ko ini tanan sa inyo,
indi bala?’.
Nahauna subong nga adlaw sang
aton Misa Aguinaldo kag ginapatungud naton ini nga selebrasyon sa paghinala sa
aton mga kautoran nga lain sa aton ang pagtulu-ohan apang sa pihak nga bahin
katapo sang aton isa ka pamilya sang mga kaanakan sang Diyos. Kita tanan may
katungdanan sa pagpakamatarong tungud kita mga gintuga sang Diyos suno sa Iya
laragway. Sa aton Ebanghelyo, ang aton Ginoo maathag nga nagasiling nga may
yara nga mas daku nga nagapanaksi sa Iya mga ginahambal… ang Iya mga BUHAT nga
ginhatag sang Amay sa Iya nga Iya nga himu-on. Sa bagay nga makita sa mga buhat
sang aton Ginoo ang kalooy sang Amay nga Iya ginapatuhoy sa Iya mga katawhan.
Ang pagpakaig-angut sa aton utod,
indi lamang sa mga kristiyanos, isa ka pangkabug-osan nga panawagan sa pagbuhat
sing maayo sa aton isigkatawo ano man nga sahi ang iya pagtulu-ohan. Wala ginsiling
sang aton Ginoo nga dapat lang kita magmaayo sa mga nagatuo sa Iya, kundi sa
tanan nga mga naulihi, mga nadula, kag mga ginasika-sika. Kon sayuron, ang aton
mga utod nga nagakinahanglan sing bulig. Dira ang buhi nga presensya sang aton
Ginuo nga padayon nagapangita sang aton nga pagbaton, kalooy kag paghigugma.
Nagasugod na ang aton malapit na
lang nga paghanda sa palaabuton nga pagkatawo sang aton Ginoo, kag ginahanda
naton ang aton kaugalingon sa matawo nga prinsipe sing paghida-it nga magahari
sa aton tagipusoon kag kabuhi. Masami naga-ilinaway kita tungud sa aton
nanuhaytuhay nga mga pagtulu-ohan tungud nagasiling kita nga aton gid ya ang
tama sa tanan kag wala naton ginatahud ang lain sa aton. Sa baylo aton sila
ginatampukan sang malain nga mga hala kag mabugnaw nga pagtamud. Apang sa pihak
nga bahin, ang Prinsipe sing Paghida-it nga matawo sa aton nga tunga isa ka
Prinsipe nga wala lang matawo sa isa ka sahi nga pagtulu-ohan kundi para sa
tanan nga tawo sang kalibutan.
Ini nagapahayag sa aton nga mangin
bukas kita sa tanan nga sahi sang pagpakig-angut kay sa bisan diin, kon ang isa
ka tawo nagahimo sang kaayohan sa iya isigkatawo, siya nagapakita sang buhi nga
presensya sang Diyos nga mabatyagan sang tagsa-tagsa. Siya instumento sang
pagpahayag sang Diyos sang Iya nga kaugalingon sa tagsa ka tawo- nga sa
gihapon, padayon nga nagapanghikot ang Diyos sa kabuhi sang tagsa-tagsa. Matahum
gid nga karon nga tuig ginapatungud sa aton bukas nga kaangtanan sa mga
kautoran naton nga la-in ang pagtulu-ohan kay sa pagkamatuod sila man aton mga
utod. Sila dapat man ulikdan sang aton pahanungdan kay sila bahin sang mga
gintuga sang Diyos nga nagpaambit sang Iya nga kaayo sa aton tanan. Indi naton maabut
ang paghida-it sa pagbina-isay, kay ang isa magapakamatarong sang iya
kaugalingon ukon paagi sa pag-ilinaway kay ini nagapadalum lang sang samad sang
isa kag isa. Magaluntad lamang ang paghidait kon may maayo nga paghangpanay!
Dec. 17, 2019 (2nd
Day):
Daw makatuluyo pamati-an ang
Ebanghelyo subong. Hamakon niyo ginpatpat sa aton ni San Mateo ang mga
katigulangan sang aton Ginuo nga nga may tatlo ka katorse nga henerasyon sang
mga tawo nga indi man gani naton kilala kag ang ila mga ngalan daw indi kita
sing pamilyar kag ang iban pa gani daw palataw-an. Manami lang lang sang
ginsuguran kay si Abraham amay ni Isaac: Si Isaac amay ni Jacob; si Jacob amay
ni Juda kag sang iya mga utod nga lalaki. Si juda amay ni Fares kag ni Zara nga
ang iya iloy sini amo si Tamar. Pag-abut mo kay Tamar, tamaran ka na sing basa
kay sa kalawiglawig sang panaysayon ni San Mateo. Pero ngaman nga gin-usikan gid
ni San Mateo ang pagpatpat sa aton sining mga katigulangan ni Jeus sa aton? Ini
agud mahibalu-an naton nga si Jesus wala lang magkari sa kalibutan sa isa ka
pitik sang tudlo kundi nagkari Siya subong isa sa aton nga may ara man nga
ginhalinan kag may yara man nga mga katigulangan. Siya bahin man sang rasa sang
tawo nga indi gid man perpekto kundi katulad naton, may mga katigulangan man
nga mga makasasala.
Pareho na lang abi kay Haring
David. Siya nagpangasawa sang asawa sang iya nga Heneral nga iya ginhungud
butang sa una nga linya sang patag-awayan sa diin malapuyot ang inaway agud
siya madali mapatay kag maasawa nia ang asawa ni Urias, ang iya heneral, nga
nakita niya nga nagapaligo sang siya mag-gawa sa iya nga tore nga amo si
Bathsheba. Sa sini siya nagkaanak kag ini siya amo si haring Salomon, ang
pinakamaalam nga hari sang bug-os nga kalibutan, nga iya kaalam indi matupungan
ni sin-o man sa bug-os nga kalibutan.
Ang pamilyar gid siguro nga
ngalan nga aton matandaan amo ang ngalan ni Abraham tungud siya amo ang amay
sang bug-os nga katawhan pagkatapos ni Adan kag ni Eva. Kon sayuron, siya ang
amay sang tanan ano man nga sahi sang pagtuo nga may yara kita. Sa bagay nga
ang aton Ginoo nagpanudlo nga ang tanan nga mga tawo mga anak sang Diyos kag
gani kabigon naton bilang aton mga utod. Ang aton Ginoo nagpanudlo sa aton nga
kon magpangamuyo kita magtawag kita sa aton Amay sa langit bilang “Amay namon”
kay siya Amay sang tanan nga mga katawhan kag kita tanan mag-ululutod sa Iya
nga pagkaamay. Gani wala Siya sang ginapili nga pagtulu-ohan o relihiyon. Para
sa Iya ang tanan isa lang ka panimalay sa Iya pagka-amay. Kita ya ang nagbuhat
sang mga pagbinahin-bahin sa aton nga tunga ayhan sa kon ano man nga motibo sa
mga nagtukod sini.Masubo man nga lantawon nga kita-kita man lang nga
mag-ululutod ang nagasinamaray kag nagadinumtanay lamang nga magpangin-ibabaw
kita sa isa. Ngaman nga indi kita makabuligay agud mabalay ang paghari sang
Diyos sa aton tunga? Ngaman nga indi kita magpangamuyu-ay sa isa kag isa nga
madangat naton ang paghida-it nga magluntad sa aton nga tunga? Ngaman nga indi
kita magbuligay bilang mag-ululutod agud kita mangin isa ka buhi nga Lawas ni
Kristo kag manginsaksi sang kaalwan sang Diyos sa tanan nga katawhan?
Suno sa panaysayon ni San Mateo,
isa lang ang aton ginhalinan. Ayhan ang aton mga katigulangan kag bisan kita
may mga kasaypanan tungud kita mga rasa sang mga tawo nga makasasala, apang
indi ini mangin-upang para sa aton sa pagbakas nga mag-ilog kay Kristo nga
nagpakatawo agud ihi-usa ang tanan sa Iya nga Amay. Kita sarang mangin instumento
sang paghida-it kag paghi-usa kon tugutan naton ang aton kaugalingon nga mangin
alagyan sang kaayo sang mahal nga Diyos ilabi na gid sa aton mga utod nga
nagakinahanglan. Gub-on naton ang pader sang pagbinahin-bahin nga aton gintuga
sa aton tunga tungud sang aton nga pagtuo kag magpanrabaho kita bilang isa ka
Lawas ni Kristo nga nagahulag suno sa binubu-ot sang Amay agud kita tanan mangin
bahin sang isa lamang ka pamilya nga nagahi-usa kag may isa lamang ka Amay sa langit
nga amo ang tagtuga sang tanan. Kalimtan naton ang aton pagbinahin-bahin kag
atubangon naton nga isa ka matahum nga bwasdamlag sa diin nagahi-usa kita
tanan!
Mabudlay abuton ang aton
ginahandum nga paghi-usa tungud sa
masami luyag naton magpangibabaw sang sa iban sa bagay nga kon kaisa daw
ginatumo-tumo ta lang ang lain sa aton nga pagtuluohan, apang kon aton gid
usisa-on sing maayo ang mga pulong sang Diyos, ini nagapahanumdum sa aton nga
kita indi sang lain sang sa iban tungud palareho lang ang aton ginhalinan kag
kita naga-ambit sang isa lang ka kinatuhay nga amo ang pagkamakasasala, sa
bagay nga wala gid kita sing rason nga maglabaw sang sa iban kay sila katulad
man naton may mga kakulangan kag kapaltahan. Sa aton tanan nga paghimud-os,
kita makalampuwas sa aton kaluya kag masinaligon kita nga magdangup sa aton
Amay nga labaw sa tanan. Sa Iya naton isandig ang aton kahuyang kay Siya gani
nagpakatawo agud kita may kusog sa aton kaluya.
Dec. 18, 2019 (3rd Day):
Nagapati bala kamo sa damgo? May
iban nga nagasiling nga ang aton nga damgo nagaminatu-od, ang iban man
nagasiling nga ang aton nga damgo kabaliskaran sa tuod-tuod nga hitabo. May isa
ka tawo nga nagdamgo. Suno sa iya nga damgo, siya ang pinaka-gwapo nga tinuga
sa bug-os nga kalibutan kay perpekto gid ang iya lawas kag gwapo ang iya nga
guya. Sang pagbugtaw niya, ginlantaw niya ang iya kaugalingon sa espeho kag sa
daku nga kakibuton nagsinggit sia nga nga: ‘Murto!’ kay sa pagkamatu-od ang iya
itsura daw butot sang gorilya kag ang iya lawas daw latoy nga naghiyos!
Daku-daku ang iya katingala nga ang iya gali nga tunay nga pagkatawo indi
pareho sang iya nga damgo.
Si San Jose subong sa Ebanghelyo
nagdamgo man, apang ang iya nga damgo nangin isa ka kamatuoran tungod siya
nagtuo sa binubu-ot sang Diyos nga ginpahayag sa iya sang anghel. Nangin isa
ini ka kamatu-oran kay sia nagsalig sa binu-buot sang Diyos suno sa ginsaysay
sang mga propeta nga ang isa ka birhen magabun-ag sang isa ka bata nga
pagatawgon nga Emmanuel nga kon sayuron ‘ang Diyos kaupod naton’. Sa iya nga
damgo si San Jose nagpaidalum sa binubo-ot sang Diyos kag sa iya tagsa ka
tikang nakita niya nga matu-od ang ginpromisa sang Diyos paagi sa anghel nga
nagtunda sa iya. Ini nga birhen maga-anak sang isa ka bata nga magadala sang
mensahe nga ang Diyos wala nagapabaya sa Iya mga tawo, kag paagi sa Iya,
magaluntad ang paghi-usa kag paghida-it sa tunga sang mga tawo. Siling gani
sang aton Santo Papa Francis, nga indi kita dapat mag-untat sa pagdamgo para sa
aton kaugalingon, panimalay kag katilingban, kay ang aton maayo nga bwasdamlag
makita sa paghuman sini nga mga damgo sa kamatu-oran sang aton adlaw-adlaw nga
pangabuhi. Magpangayo kita nga bendisyonan sang Mahal nga Diyos ang aton mga
damgo, kag ini maagum man naton kon kita nagapanrabaho sa katumanan sini.
Sa sining panahon sang malapit na
lang ngapagkatawo sang aton Manluluwas, ginaagda kita sa pagdamgo sang mga
bagay suno sa binubu-ot sang Diyos, kag ini nga damgo amo ang aton paghiliusa
kag pagpaluntad sang paghidait sa aton nga tunga. Kalimtan ta na ang
pagbinahin-bahin nga gintuga sang aton nagkalain-lain nga mga relihiyon o
pagtuo, kundi magpanrabaho kita bilang isa ka katilingban nga may isa gid lang
ka handum nga amo ang paghili-usa sang tanan kag paghida-it sang kalibutan.
Ayhan mabudlay ini nga damgo
tungud ang kalabanan sa aton gusto magpakita nga ang iya pagtuo amo ang tunay,
apang kon aton gid lantawon sing maid-id, kita isa lamang ka pamilya nga ang
iya nga handum gid lang amo ang paghida-it kag paghili-usa sang tanan. Tanan
kita ginatawag nga mangin alagyan sang kaluwasan sang Diyos kag kita ginatawag
sa pagpaambit sang Iya nga kaalwan sa tanan nga mga rasa sa mga kapungsoran
bilang tanda nga Iya kita mga kaanakan. Sarang naton mahimo ini kon una sa
tanan aton ginahuptan sa aton tagipusoon nga kita mga mag-ululutod sa isa
lamang ka Amay sa langit nga amo ang nagapanghikut sa aton mga giho agud aton
malambut ang isa ka kalibutan nga may isa ka ginapadulungan nga amo ang isa ka
panimalay sang Diyos.
Magpasakup kita sa mga buluhaton
sang aton nga Simbahan tuhoy sa paghi-usa kay kita bahin sang mga lihuk sang
Lawas ni Kristo. Indi ayhan naton madala ang aton mga kautoran nga may lain nga
pagtuo apang sarang gihapon kita nga mangin instumento sa pagpabatyag sa ila
nga sila aton mga utod paagi sa pagbuhat sing maayo sa ila, sa pagbulig sa ila
mga kinahanglan, kag sa pagsapupo sa ila kon sila ginabale-wala. Sila sa
gihapon nagapabilin nga aton mga utod kag sa idalum sang pagka-amay sang aton
Amay sa langit, sila aton responsibilidad ano man nga sahi ang ila
pagtulu-ohan. Kita wala mahilayo sa ila kay sila aton man kabahin sang
panimalay sang Diyos kag gani sila man aton kaupod sa lamesa sang aton Amay sa
langit. Diri naton ikabuhi ang aton damgo nga mangin-isa kita ka bug-os nga
katilingban.
Subong nga tuig, tuig sang
paghinala sa aton mga utod nga lain sa aton ang pagtuo kag relihiyon, apang
ginapanumdum kita sang aton nga Ebanghelyo nga kita tanan may isa lamang ka
damgo nga luyag lab-uton kag ini amo ang katulad sa damgo ni San Jose nga kita
mangin alagyan sang Manluluwas nga nagadala sang paghi-usa kag paghidait sa
aton nga tunga. Ngaman nga indi naton pagtulukon ang palareho nga aton
gina-ambitan sang sa tulukon naton ang aton diperensya sa isa kag isa. Siguro
kon kita mapanarabaho sa aton isa ka kawsa, mas madali naton maabut ang aton
nga damgo nga amo ang paghida-it kag paghili-usa sang tanan. Ayhan aton
matalupangdan nga kita mag-ululutod sa isa lamang ka Amay nga amo ang taghatag
sang kabuhi sa tagsa-tagsa. Kon kita gid man nagapanrabaho, ini para sa
paghi-usa sang tanan nga mga tawo sang bug-os nga kalibutan.
Dec. 19, 2019 (4th
Day):
May mga kongregasyon sang mga monghe nga ang ila
pagsulundan amo nga makahambal lang sila sang duha ka tinaga kada lima ka tuig
magluwas lang kon ang ila nga “prior” magpahanugut sa ila sa paghambal kon sila
may mga bisita, tungud sila nagapati nga ¾’s that comes out from the mouth of
man everyday is sinful. Gani ginpakamaayo nalang nila nga maghimo sang ‘code of
silence’. May isa ka tawo nga nagsulud sa pagkamonghe, kag sa sulud sang lima
ka tuig wala gid siya ka mitlang sang tinaga. Nag-abut ang primero nga lima ka
tuig sang iya pormasyon kag siya ginpahanugutan siya sa paghambal sing duha
lang ka tinaga, kag iya nga hambal amo ini: “higdaan ti-a!”. Nagpadayon naman
ang iya pagkasumulunod, kag sang ikanapulo ka tuig, siya naman ginpahanugutan
sang iya ‘prior’ mga maghambal sang duha ka tinaga. Kag nagsiling siya: “pagka-on
bugnaw”. Sige pa gid ang iya formation, kag sang ika-kinse na ka tuig sang iya
pagtiner sa monastery ginpahanugutan naman siya sa paghambal sang duha ka
tinaga. Ang iya hambal amo ini: “ Ako gwa!” Nagsabat ang iya ‘prior’,: “Wala
sing duda, kay sa sulud sang kinse anyos ang imo gid lang obra amo ang
pagrineklamo!”.
Kabudlay gid man kon indi ka
makahambal, kapin pa gid kabudlay kon ikaw mangin apa kay wala gid sang nagagwa
sa imo tutunlan. Ini tungud gusto naton maghinala sing pirme sang sa magpamati
sa nagahambal. Siling gani sang mga tagalog: ‘Puro tayo dada, kulang sa gawa!”.
Amo ini ang rason kon ngaa man ang aton pagsinalayo nagabinanggi-anay kag
masami nga may di-paghangpanay tungud kay gusto lang kita masghinambal, apang
kulang kita sa pagpamati kon ano ang aton dapat himu-on. Amo ini ang natabo kay
Zachariah, ang tatay ni Juan. Gusto lang niya maghinala parti sa Diyos, kay
siya isa ka pari, apang nalimtan niya ang pagpamati sing maid-id sa Diyos nga
may mensahe sa iya paagi sa isa ka anghel. Sa bagay nga siya nagpangduha-duha
nga ang angel nagabinutig sa iya, kag iya nalipatan nga ang isa ka anghel isa
ka mensahero sang Diyos nga nagadala sang Iya balita angut sa aton kaluwasan.
Sa sini ginpahanumdum siya sing angel nga wala sing indi mahimo sa Diyos
katulad abi sang pagbusong sang iya asawa nga tigulang na kag baw-as. Siya
lamang dapat magtuo sa panugiron sang angel nga ang kabubut-on sang Diyos
matuman. Apang siya nagpangduha-duha sa mga ginpaalinton sang anghel sa bagay
nga ginpa-ibabaw niya ang iya tawohanon nga ihibalo nga imposible na nga
magbusong ang iya nga asawa tungud ini siya baw-as kag tigulang na sa
panu-igon. Apang ginpakita sa iya sing anghel, nga siya wala nagabutig sa iya,
kag bilang silot sang iya pagpangduha-duha, ginhimo siya sang Diyos nga apa
tubtub nga mabun-ag si San Juan Bautista nga amo ang magahanda sa alagyan sang
Manluluwas sang kalibutan.
Sa aton nga panahon subong,
madamo sa aton ang pareho kay Zachariah. Madali kita magduda sa mga kabubut-on
sang Diyos kag madali kita matiplang sang mga pangkalibutanon nga mga
panghuna-huna kay masyado na ka abanse ang siyensya kag ang nahibalu-an sang
tawo. Masami ang ginahandum lang sang una sang tawo, subong nangin isa na ka
hayag nga kamatuoran nga nagakahanabo sa iya palibut. Siling anay sang lolo ko,
pag-uso sing karaoke, ‘magaabut ang ti-on nga kita maga-upod na gid sa
manugkanta kon kita magkanta sang iya ambahanon.’ Kag daw linabo sa bato ang
ginhambal ni lolo. May ara na kita karon nga videoke, kag virtual reality. Ang
sang una nga hinganiban nga pana subong, isa na ka fully developed nga missile.
Ang kadasig sing bala, indi na lang sa pusil makita kundi bisan sa salakyan
sing tawo, ara ang bullet train. Siguro sa ulihe ang dust pan mahimo na naton
nga salakyan pakadto sa iban nga lugar. Madamo pa nga mga pag-umwad ang nahimo
sang tawo sa iya palibut apang ngaman sa gihapon wala naton matukiban ang
sekreto sang aton paghiusa bilang isa ka panimalay sang Diyos? Ini ayhan tungud aton lamang ginatulok ang
mahimo sing tawo apang malayo ang aton binubuot sa luyag sang Diyos. Sa Diyos
wala sing indi sarang mahimo. Amo ini ang mensahe sang anghel kay Zachariah.
Nga ang Diyos luyag magpasilabut sa aton maragtas tungud luyag niya ihatag sa
aton ang kaluwasan kag kinahanglan nga bukas ang aton tagipusoon sa Iya
binubu-ot kay Siya indi gid magpatalang sa aton. Nagapanghikut Siya sa
makatilingala nga hitabo sa aton kabuhi agud nga sa ulihe may isa panong nga
Iya pagadumalahan nga Iya dal-on sa madamul nga halalban.
Ang Tuig sang pagpakighala sang
mga lain-lain nga pagtuo, isa ka lihuk sang Simbahan sa pagtingub sa aton tanan
bisan kita yara gid nga may itugda sa kamatuoran sang aton nga pagtuo. Isa ini
ka buluhaton nga naganganyat sa aton tanan sa paghimo sang mga pamaagi agud
kita magtingub bilang isa ka banwa sang Diyos nga mangin instumento sang Iya
paghidait. Ginaagda kita nga maghili-usa sa aton mga kautoran bisan ano pa man
ang ila nga pagtuo tungud kita tanan may isa lamang ka handum nga amo ang
paghi-usa sang tanan nga mga tawo sang kalibutan.
Dec. 20, 2019 (5th
Day):
Isa ka maestra ang nagsiling sa
iya mga estudyante nga imposible para sa isa ka balyena ang pagtulon sang isa
ka tawo kay gamay lang kaayo ang ila tutunlan kag magagmay lang nga isda sa
dagat ang ila ginaka-on. Ang bata nga babayi nga iya estudyante nagsiling: ‘Mam
ginasiling sa Biblia nga si Jonah gintulon sang isa ka balyena!’ Ang maestra
nagsabat nga: ‘Imposible gani kay
magagmay lang ang tutunlan sang balyena kag magagmay lang nga isda ang ila
ginaka-on agud mabuhi’. Naakig ang bata kag nagsiling: ‘Bay i lang Mam kay
pagsaka ko sa langit, pamangkuton ko si Jonah’. Ang iya maestra nagsabat:
‘Paano kon si Jonah nagkadto sa impyerno?’. Ang bata nagsiling: ‘Kundi
pamangkuyon mo siya mam’.
Daw kabudlay gid man tunlon ang
isa ka imposible nga mangin possible. Kabudlay hangpon nga ang isa ka ulay kag
birhen magabusong kag magaanak apang nagapabilin ang iya pagkabirhen sa
gihapon. Amo ini ang natabo kay Maria sa aton Ebanghelyo subong. Bisan siya
nagalibug ang ulo kon paano ini mahanabo, apang siya nagpaidalum sa binubu-ot
sang Diyos nga wala nagabutig sa iya sa mga pahito nga Siya lang ang
nakahibalo. Ayhan mabudlay kaayo kay Maria Santisima ang pagpasugut sa
binubu-ot sang Diyos tungud nahibalu-an niya ang iya estado kag nahibalu-an
niya nga siya birhen kag ulay. Sa bagay nga daw halos imposible ang gintunda sa
iya sing anghel nga mangin isa ka iloy, kag indi lamang iloy, kundi iloy sang
Manluluwas sang kalibutan. Para sa iya tawohanon kag simple nga pag-intindi,
ini daw indi gid mahimo tungud ang ginahambal sang anghel daw halos imposible
nga pahito. Apang mapag-on kaayo ang pagsalig ni Maria nga sang ginsugiran siya
sing anghel sang mga palatandaan nga ang iya paka-isa nga tigulang na kag
baw-as nagabusong na sa isa ka bata nga lalaki. Sa wala sing pagpangduhaduha sa
binubu-ot sang Diyos, siya naghatag sang iya pagpasugut nga mangin alagyan sini
nga plano sang Diyos agud Maluwas kita kag maka-ambit sang Iya pagkahari sang
paghida-it sa wala’y katapusan.
Ang ginhimo ni Maria indi sing
mahapos, tungud nagpa-ubos gid siya sang iya kaugalingon sa pagdumalahan sang
Diyos. Ayhan narumpag ang iya mga plano nga luyag man siya magbalay sang isa ka
matarong nga panimalay, ayhan, nga magpamata sing madamo, kag magpangabuhi nga
katulad sang isa ka normal nga asawa. Apang iya ini tanan ginhalad sa Diyos nga
nahibalu-an niya nga may yara nga mas madalum nga plano sa iya. Siya
nagpaidalum sa pagbulut-an sang Diyos tungud siya nagtuo nga ang Diyos amo ang
nakahibalo sang tanan nga maayo sa iya kabuhi. Wala gid si Maria
nagpangduha-duha sa plano sang Diyos sa bagay nga ginhatag niya ang iya bug-os
nga pagsunod sa kabubut-on sang Diyos agud matuman ang Iya plano sa kaluwasan
sang katawhan.Sa aton adlaw-adlaw nga pagkabuhi, ginabutang man kita sa patag
sa diin ang aton pagtuo yara sa daku nga paghangkat. Masami kon naga-atubang
kita sa aton mga utod nga indi pareho sa aton sing pagtulu-ohan, luyag naton
nga ang aton buot ang magpangin-ibabaw kag gani nagahimo kita sang mga pahito
nga mabutang sa alang-alang ang aton mga utod kag mapanubo ang ila ginapatihan.
Natural gid lang nga aton pangapinan ang aton pagtuo apang kon ini mangin
kabangdanan agud magnubo ang aton panulok sa aton isigkatawo ukon mahilayo pa gid
siya sa aton, matahum siguro nga tulukon naton si Maria subong kag ang iya
ginbatas lamang nga maankon naton ang isa ka Manluluwas nga magadala sing
paghida-it kag paghili-usa sa aton nga tunga. Si Maria wala nagpili nga ang
kaluwasan para lang sa banwa sasng Israel kundi siya nagpasugut sa binubu-ot
sang anghel nga mangin alagyan sang kaluwasan para sa tanan. Amo man sa aton.
Dapat naton himulatan nga kita mangin instumento sang Diyos nga maghi-usa ang
tanan sa idalum sang Iya pagkahari kag indi kita mag mangin kabangdanan sang
pagbinahin-bahinay paagi sa aton masakit nga tinaga nga ginahaboy sa
tagsa-tagsa. Kita man amo ang bag-o nga mga alagyan sang Diyos para sa
paghili-usa sang tanan kag yara sa aton ang lyabi agud kita mangin isa ka
minatuod nga Lawas ni Kristo nga nagaluntad sas pagdala sang paghida-it sa
kalibutan. Amo ini ang binubu-ot sang Diyos, nga kita tanan maghiliusa sa
idalum sa pagsunod sang Iya kabubut-on katulad ni Maria nga wala magpanumdum
sang iya kaugalingon lamang nga ikaayo kundi ang ikaayo sang bug-os nga
katawhan.
Makighinun-anon kita sing
matawhay sa aton mga kautoran nga lain sa aton ang ila nga pagtuo kag aton
tulukon ang pagtuman sang binubu-ot sang Diyos para sa aton tanan, kag
magkasugut kita sa pagpangita sing mga pamaagi sa diin kita mangin minatuod nga
mga instrumento sang Iya pagpahayag sang Iya kaugalingon sa bug-os nga
katawhan. Isa kita ka linahi nga may isa lamang ka Amay sa langit, sa bagay nga
wala sing rason nga kita magbang-gi-anay sa aton nga pagtuo. Sa baylo kita
kuntani magpangita sang mga pahito agud mabalay naton ang isa ka katilingban
sang mag-ululutod nga nagarespeto sang kina-iya sang tagsa-tagsa kag nagahimaya
sa isa lamang ka Amay sa langit!
Dec. 21, 2019 (6th
Day):
May isa ka presidente sang BEC sa
isa ka Baragay Chapel nga nagapanglimpyo sang Sabado sang hapon tungud may Misa
sila pagkamasunod nga adlaw. Nag agi ang duha ka pastor sang isa ka relihiyon
kag nagpakighala sa iya. Siling sang pastor sa tigulang nga nagapulupanilhig:
‘Bal-an mo lola, ang pari bala nga nagamisa sa inyo dire kada Domingo,
ginatunto lang kamo sina!’ Nagsabat man ang tigulang: ‘Toto, kon nagkari kamo
dire agud tuntohon man ako, bay-i na lang ang amon pari ang magtunto sa akon.
Maayo na nga isa lang siya sang sa duha kamo, kay magalasa pa ang espiritu ko’.
Ang ginahulat ayhan sang tigulang
amo nga may dala nga Maayong Balita ang mga pastor sa iya. Sa baylo, mala-in
nga balita ang iya nabati-an kag ini amo ang pagpakala-in sang pari nga nagamisa
sa ila kada Domingo. Pila ayhan sa aton ang masami nagadala sang malain nga
balita sa aton mga kasilingan? Nga imbes husto nga balita ang aton ginadala,
aton ginadala, tsismis, nga masami nagasamad sang integridad sang tawo. Sa
bagay nga ang natungdan indi gid makapanagang sa iya nga kaugalingon tungud nga
siya nasamad o nahalitan na tungud sang aton nga baba. Ginasiling gani nga
pwede kita ka patindog liwat sang mas matahum nga balay kon ini maguba o
masunog, apang kon ang dignidad o integridad sang tawo ang aton masamad, indi
ta na ina mauli bisan ano pa nga pagpangayo sing pasensya. Ina nga tawo
magapabilin nga samad sa atubang sang iban kag ang makabalik gid lang sang iya
pagkabug-os amo ang grasya sang Diyos.
Amo ini ka importante ang
pag-abi-abi ni Elizabeth sa pagdu-aw sang iya paka-isa nga si Maria. Si Maria
wala magdala sang mala-in nga balita, kundi iya nga gindala ang maayong balita
nga amo ang presensya sang aton Ginoo sa iya pakaisa nga si Elizabeth nga
nagabusong man sa isa ka bata nga lalaki. Ang pagdu-aw ni Maria nagdala sing
kalipay tungud kinahanglan gid ni Elizabeth ang bulig tungud nga siya tigulang
na sa panuigon kay ayhan nahimo na nga lilibakon sang iya mga kaingud. Apang
ang pagdu-aw ni Santa Maria naghatag sa iya sing pagla-um kag kusog nga sa
tunga sang tanan nga mga kabudlayan, yara ang Diyos nga naga-alay-ay sa iya sa
iya mga kinahanglanon. Ang maayong balita nga gindala ni Maria amo ang
pagpahanumdum kay Elizabeth nga ang Diyos wala nagakatulog, kag sa gihapon yara
Siya sa aton luyo sa tagsa naton ka kinahanglanon.
Matahum ang ginpakita ni Maria
nga pagtalupangud sa iya paka-isa. Nagapahanumdum ini sa aton nga kita man
dapat magdala sing maayo nga balita sa aton mga kautoran kag kita mga alagyan
sang Diyos sa pagbulig sang mga nagakinahanglan. Ang mga nagakinahanglan wala
naga-isip sang rasa, relihiyon, o kultura. Sa palaanggiran sang aton Ginoo nahanungud
sa maayo nga Samariahanon, Iya ginpakita nga ang pagbulig wala nagatan-aw kon
kita abyan o kaaway sang isa ka tawo. Ang tanan nga tawo aton nga utod ano man
ang iya rasa, du-ag, relihiyon, ukon ginatu-ohan. Siya bahin sang aton
kaugalingon tungud siya katapo sang panimalay sang Diyos nga amo ang Amay sang
tanan.
Masami, sa aton adlaw-adlaw nga
pagkabuhi, indi sang amo sini ang nagakahanabo kay ginapili ta lang ang aton
ginabuligan o gina-ulikdan. Kon apin gani sige, pero kon kontra gani, wala ako
makakilala. Kon may mapulos kita, hala sige, kon pierde gani kita, bay-i lang
da. Kon may makuha gani kita, ihatag naton ang tanan, kon daw kita ang kuhaan
tungud kita nagabulig, pasensya na! Wala sing ginapili ang bululigan kay ang
tanan nga nagakinahanglan aton nga utod. Kita ginapahanumdum subong sang aton
santos nga Ebanghelyo nga bisan kita may mga kinahanglanon man dapat naton tamdon
ang mas nagakinahanglan sang aton nga bulig katulad ni Maria sa aton Ebanghelyo.
Siya nagabusong man katulad sang iya pakaisa nga si Elizabeth apang wala ini
paghimo-a niya nga kabangdanan agud indi siya magdab-ut sang iya nga bulig.
Wala ini magmangin upang sa iya agud indi siya magpa-abut sang iya bulig sa iya
paka-isa nga sa Elizabeth.
Subong nga tuig, kita ginahangkat
sa paggwa sa aton kutiba sang pagpa-iya-iya kag katawhay, lamang nga maglab-ut
man kita sa aton mga utod nga nagakinahanglan. Sa paglampuwas sang aton mga
diperensya ilabi na gid sa aton pagkapili-an sa aton utod nga dapat pareho lang
sang aton pagtuo. Kita dapat maglapus sa gintuga naton nga pader sang
pagsinamaray sa aton isigkatawo tungud sila la-in sang sa aton nga pagtuo.
Ipakita naton ang pagrespeto gihapon sa ila tungud sila mga tawo man nga may
dignidad kag kaliwat sang isa lamang ka Manunuga nga amo ang ginakabig naton
nga Amay. Kabigon naton sila nga mga utod sa tunga sang aton kinatuhay sang
pagtuo, kag indi gid kita magkakas sang aton mga kamut nga magdab-ut sa ila sa
pagbulig kon sila nagakinahanglan kay sila man aton nga salabton.
Dec. 22, 2019 (7th
Day):
Isa ka nga
manager ang may kaangtanan sa iya nga sekretarya sa likum lang nga paagi. Isa ka
adlaw, tuman gid ang ila paghigugmaanay sang iya nga sekretarya nga nahulog sila
sa pagpanginhilawas sang sobra sa tagsa-tagsa nga gin-akat siya sang iya
sekretarya nga magkadto na lang sa iya apartment. Nag-upod siya kag sa gihapon
daw indi gid maumpaw ang ila luyag sang lawas sang isa kag isa. Natulugan sila
ayhan sa tuman nga kakapoy kag nagbugtaw na sila alas otso sing gab-i.
Pagbugtaw nila iya ginhambalan ang iya sekretarya nga kuha-on ang iya sapatos
kag inusnos sa mga hilamon kag lapuk sa ugsaran sang apartment sang babayi. Ang
sekretarya naglibug ang ulo, apang nagtuman sa gusto sa iya manager.
Pagkatapos, ginsuksok sang manager ang iya sapatos pagkatapos niya mag-ilis kag
nagpa-uli sa ila balay sa diin nagahulat ang iya asawa. Pag-abut gid niya,
dayon siya ginpamangkut sang iya asawa nga may kaakig nga nagsiling: ‘Diin ka
naman maghalin?’ Kag nagsabat siya : ‘Bal-an mo, sa pagkamatuod, may ara ako
nga kaangtanan sa akon nga sekretarya, kag natabo kami sa bug-os nga hapon, kag
nakatulog kami. Nagbugtaw na lang kami alas otso na sing gab-i ang oras’.
Gintulok siya idalum-paibabaw sang iya asawa kag gindukol kag ginsingganan:
‘Butigon ka! Nagab-ihan ka maton hinampang sang golf, tan-awa may mga hilamon
kag lunang ang sapatos mo!’ Lusot si mister manager. He…he…he…
Sa aton Ebanghelyo
subong luyag kuntani maglusot ni Jose sa kay Maria tungud indi siya luyag nga
mahuy-an sa Maria sa mga tawo nga hambalon nga nagabusong na siya antes sila
makasal kag nagbinag-binag siya sing mga pahito kon paano mabulagan si Maria
sing tago, wala siya makatalupangud nga mas daku pa gid ang iya responsibilidad
kon iya lang pabay-an si Maria kay sigurado gid nga pagapatyon siya paagi sa
pagbato kon matukiban nga siya nagabusong, kag magaluwa sa pagbato, siya
magapabilin nga isahanon sa iya pagdala kay Jesus, ang Manluluwas sang
kalibutan. Isa ini ka daku nga palaliban kay Jose kay siya isa ka matarong nga
tawo kag indi siya luyag mabutang si Maria sa daku nga kahuy-anan, apang
ginpakita sang angel ang mas daku pa nga konsekwensya sa iya kon indi niya
pagsabton si Maria bilang iya nga asawa. Si Jesus matawo nga wala sing amay kag
mangin daku nga kahangawa ang matuga sa mga painu-ino sang mga tawo nga si
Maria nag-anak nga wala sang ginakilala nga bana. Ini nga damgo tuman na para
kay Jose ang pagbaton sang binubu-ot sang Diyos nga siya magtindog bilang amay
sa ginadala ni Maria. Sa kultura sang mga Judeo, basta gin-ako sang isa ka
lalaki nga siya amo ang amay sang anak nga ginadala sang babayi, sila ginatulok
na bilang mga mag-asawa kag tama na ina nga siya kabigon nga legal nga amay
sang ginadala sang babayi. Amo gani nga sa pag-ako ni Jose bilang tatay sang
aton Ginoo, sa mata sang layi, iya na nga asawa si Maria kag siya amo ang legal
nga bana sang babayi kag tatay ni Jesus.
Ini nga pagsalum
ni Jose sa mga palaligban ni Maria isa man ka paghangkat subong sa aton nga
panahon nga mangin ma-inamdamon sa mga balatyagon sang aton mga kautoran nga
nagakinahanglan, kritiyano man ukon indi. Ini naga-agda sa aton sa pagpatad
sang aton kaugalingon sa kon ano man nga kasitsit-an ang gina-atubang sang aton
nga utod lamang nga mahatag naton ang minatu-od nga pagpangapin sa ila sa mga
sitwasyon nga yara sila sa kahimtangan nga mabudlay kag yara sa kahimtangan nga
sa masami nagadala sa ila sa kalaglagan.
Indi bala nga
masami ginabuligan ta lang ang mga su-od sa aton? Mga abyan, himata, ukon
ka-kilala nga sa aton paglantaw nagakinahanglan lang sing bulig. Paano ang mga
linibo nga indi naton kilala apang labi nga nagakinahanglan sang aton nga
bulig? Ang nahalitan sing bagyo, baha, sunog, linog, kag iban pa nga ginhalitan
sang mga kalamidad? Ang mga biktima sang inhustisya tungud wala sila sing
ikasarang sa pagpangapin sang ila kaugalingon? Ang mga may sakit nga
nagapabilin na lang sa ila mga higdaan tungud wala sila sing ikasarang sa
pagbakal sang mga bulong? Ang mga namatyan nga na-obligar na lang sa pagpasugal
agud may ibayad sa punerarya para sa ila mga nagtaliwan nga mga pinalangga sa
kabuhi? Ang halos mangawat na lang tungud wala na sila sing inugbakal sing
pagka-on, kag iban pa naton nga mga utod nga nagakinahanglan sang aton nga
bulig? Ayhan mapalusot naman kita nga sila basi bahin sang sindikato nga luyag
lamang mangunyadi sa aton nga kaalwan. Apang kon aton gid usisa-on sila
minatu-od nga nagakinahanglan kag nagasalig sa aton mabulig nga may kaalwan. Indi
ini tanan katoliko ukon kristiyano. Ang iban sa ila indi na gani kapalapit sa
Simbahan tungud sang ila miserable nga kondisyon, apang yara sila sa aton mga
ugsaran ukon alagyan nga nagahumlad sang ila mga kamut sa pagpangayo sing
bulig. Sila amo ang matuod-tuod naton nga mga utod kag kon ginahimo naton ang
pagbulig sa ila sa bug-os naton nga kaalwan, nagabulig man kita kay Kristo nga
yara lang sa dagway sang mga imol kag ginakulabos naton nga mga utod!
Dec. 23, 2019 (8th
Day):
Isa ka makawat
ang nagsulod sa isa ka balay isa ka gab-i kag sang nagapamukad siya sa mga
pagkabutang sang tag-iya, may nabati-an siya nga isa ka tingug nga nagahambal:
“Si Jesus nagalantaw sa imo”. Kinulbaan ang makawat kag dali-dali niya
ginpasiga ang iya flashlight sa may ginhalinan sang tingug. Kag nakita niya ang
isa ka hawla nga may sulod nga ‘parrot’, kag nagpangusisa siya sa ‘parrot’, :
“Ikaw bala ang nagahambal?”, kag ang ‘parrot’ nagsabat, ‘huo’. Kag ang makawat
nagsaling: “kag sin-o ang imo ngalan?”.
Ang ‘parrot’ nagabat: “Si Moises?” Nagpatawa ang makawat kag nagsiling: “Sin-o
nga buang ang naghatag sang imo ngalan?”. Ang ‘parrot’ nagsabat: “Ang buang nga
nagpahingalan sang iya nga ido nga ‘doberman’ nga si Jesus. Nabatyagan sang
makawat nga ara na sa iya nga likud ang nagalaway kag nagangurob nga ‘doberman’
nga handa magkagat sa iya! Wala gid siya makaluwas kag nadakpan siya.
Importante kaayo
ang mga ngalan o ang kumpil, kay ini nagapahayag sang aton nga dapat nga mangin
papel sa kabuhi. Indi lang basta nagahatag kita sang ngalan sa tawo kundi
ginahatag naton ini tungud sa kalabanan nga hitabo, may mga kaangtanan ini sa
aton kaugalingno nga mga inagyan kag eksperyensya sa kabuhi.
Sa biblia,
ginahatag ang ngalan tungud amo ini ang kahulugan sang misyon sang isa ka tawo
sa kabuhi. Amo gani nga sa aton nga Ebanghelyo subong, ang ngalan sang bata ni
Zacharias subong indi sang Zacharias Junior, kundi Juan kay ang kahulugan sang
Juan amo nga ‘Ang Diyos maluluy-on’ sa Iya mga tawo. Amo ini ang misyon ni Juan,
umpisa pa sang yara siya sa tagu-angkan sang iya nga iloy tubtub siya
maghamtong kag maghimo sang iya nga misyon sa pagpakig-uli sang mga tawo sa
Ginoo paagi sa pagpatawad sang ila mga sala kag pagbautiso niya sa ila sa
Jordan. Umpisa pa lang sang iya pagkabata, ginpakiya nana Juan ang bu-ot
silingon sang iya nga ngalan, tungud ginpakita na sang Diyos ang Iya kalu-oy sa
iya nga iloy, nga bisan tigulang na siya kag baw-as, sa gihapon siya nagdala sa
iya kay siya amo ang tagpanguna sa paghanda sang mga tawo pabalik sa Diyos. Ini
nga buluhaton iya gid ginhimo tubtub siya magmangin hamtong, nga nagapanawag sa
mga tawo nga maghinulsol kag magbag-o sang ila kabuhi bilang paghanda sang ila
kaugalingon sa pagpuyo sang Manluluwas kaupod nila.
Ang ginbantala
ni Juan Bautista padayon nga nagalanog sa aton nga panahon. Isa ini ka
panawagan tuhoy sang aton padayon nga pagbag-o tuhoy sa pagkamatarong kag sa
pagkabuhi sing insakto kag tadlong sa tunga sang mga pahupos nga paagi nga
ginatanyag sang kalibutan. Ini nagatawag sa aton sa pag-usisa sang aton nga
kaugalingon kon bala ginbuhat naton ang aton buluhaton bilang mga anak sang
Diyos nga magkabuhi sa isa ka matarong nga pagkabuhi. Sa gihapon ini padayon
nga nagatublag sa aton kon nagakabuhi kita sa kadudulman sang sala, kag
nagapanago sa kabutigan tungud garuk ang aton pagginawi. Ini nga panawagan sa
pagbag-o indi lamang sa aton nga mga katoliko kag mga kristiyanos kundi sa
tanan nga mga tawo nga nagapuyo sa bug-os nga kalibutan.
Ang pagkabuhi
sang pagkamatarong isa ka pangkabug-osan nga pagpanawag tungud tanan kita mga
makasasala kag nagakinahanglan sang pagpatawad sang Diyos sa aton nga mga
kapaltahan. Isa ini ka panawag sa pagpaalam sa aton daan nga kinabuhi sang sala
padulong sa isa ka kabuhi sang pagpamanag-banag sang isa ka bag-o nga kabuhi.
Bisan ano man ang aton nga estado, may lugar gid sa aton nga pagbag-o tungud
kita tanan makasasala kag nagakinahanglan sang grasya sang Diyos agud kita
magkabuhi bilang mga matuod-tuod nga anak sang Diyos. Aton gid nga
binag-binagon ang aton Ebanghelyo subong, nga katulad kay Juan Bautista, tanan
kita may ara gid nga misyon kag hilikuton para magluntad ang ginhari-an sang
Diyos sa aton tunga. Aton panumdumon nga kita mga alagyan sang Diyos sang mga
tulumanon agud mapahayag ang Iya Maayong Balita sa tanan nga mga kapungsoran,
nga kita mga alagyan sang Diyos sang Iya kalu-oy sa tagsa-tagsa kag Siya padayon
nga magapahayag sini sa kaliwatan sang mga kaliwatan.
Kita tanan mga
“Juan” kon kita magpakita sang kalu-oy sang Diyos sa aton mga utod, ilabi na gid
sa mga nagakinahanglan nga aton mga utod sang Iya buhi nga presensya paagi sa
pagtandog sa ila sa kon kaisa sa ila makangilidlis nga kahimtangan. Tanan kita
may misyon sa pagpasakup sa misyon ni Juan nga mangin instrumento sang
pagpabatyag sang kaluoy sang Diyos nga Iya ginatigana para sa Iya mga tawo, nga
paagi sa aton, mangin isa ka panong nga masinaligon sa grasya sang Diyos bisan
ano man ang magaabut sa aton nga mga pagtilaw kay Siya sigurado gid nga indi
magpalso sa Iya mga pangako sa aton nga kita Iya paambitan sang Iya bugana nga
kabuhi. Nga sa gihapon nagahatag sang Iya nga kalu-oy sa tagsa-tagsa nga
nagakinahanglan sang Iya hamili nga bulig lamang malumpawasan ang mga pagtilaw
sa kabuhi.
May isa ka tawo
nga nakita niya ang iya nga amigo nga nagakasubo. Iya ginpalapitan kag
ginpamangkut kon ngaman nagakasubo gid siya? Siling niya: “Bal-an mo pre, tatlo
ka semana na ang nagligad kag napatay ang akon amigo nga su-od gid.” “Ahay”
siling sang iya amigo: “Condolence gid pre!”. Pero ang iya amigo nagsabat:
“Okey lang pre, kay ginbilinan niya man ako sang kwarenta mil pesos”. “Abaw,
siling sang iya amigo, bwenas ka gali pre kay ginbilinan ka sang muna nga
kantidad. Dapat magkalipay ka! Apang ang iya amigo sa gihapon masinulub-on.
Gani ginpamangkut pa gid siya sang iya amigo: “O, pre, ngaman nga masubo ka man
gihapon?” kag nagsabat ang iya amigo: “Pre, sang nagligad nga duha ka semana,
napatay ang akon pakaisa! Sa isa ka aksidente. Nalunggo gid ang iya ulo!”.
“Abaw” siling sang iya amigo: “Kalu-oy man mig ang imo paka-isa!” Apang
nagsiling ang iya amigo: “Pero pre antes siya madisgrasya, ginhatagan niya ako
sing otsenta y singko mil pesos.” “Praise the Lord” siling sang iya amigo:
“Dapat magkalipay ka kay kadaku na sina nga kantidad. Apang ang tawo
masinulub-on sa gihapon. Kag nagsiling naman ang iya amigo: “O pre, ngaman
masinulub-on sa gihapon ang imo guya?” Nagsabat siya: “Sang nagligad nga
semana, napatay ang akon tiya kay gin-heart attack!” “Baw, grabe gid ang imo
patay pre ba! Sunod-sunod!” Pero nagsabat ang tawo: “Di bale pre, ginbilinan
niya man ako sing isa ka milyon ka pesos!” Kag nagsabat ang iya amigo:
“Aleluya! Maayo gid ang Diyos no! Hamakon mo, milyonaryo ka na gali!” Apang ang
tawo sa gihapon masinulub-on. Kag ang iya amigo naghambal naman sa iya : “Dapat
ka magkalipay kay ikaw ang gintugyanan sang ila mga manggad. O, ngaman nga
masinulub-on ka man gihapon?” Nagsabat ang tawo: “Subong nga semana pre, wala
na sang napatay! Nauntat na ang akon pangabuhi-anan!”
Katunto nga
tawo. Imbes nga magpasalamat siya sa Diyos tungud siya gintugyanan sang madamo
nga mga manggad, ginhimo gali niya iya nga gatasan ang kamatayon sang iya mga
suod sa kabuhi. Imbes isipon niya ang iya nabaton nga mga grasya, ang iya sa
gihapon nga ginpangita nga kon paano siya makapangunyadi! Dapat siya
magpasalamaton sa Diyos tungud ginpaambit sang Diyos sa iya ang mga kaayohan
sang mga tawo nga malapit sa iya. Siya ang nangin manugsaho sang mga kaayohan
nga ginhatag sang Diyos sa mga ginbugayan Niya sang mga manggad.
Amo ini ang
kabug-osan sang aton nga Ebanghelyo subong. Isa ka ambahanon ni Zacharias sa
pagpasalamat sa Diyos sa pagpaambit sang Iya kaalwan sa tanan nga mga tawo
ilabi na gid sa mga imol, sa mga yara sa kadulum, kag sa mga nagakabuhi sa
landong sang kamatayon. Suno kay Zacharias” “Kay ang aton Diyos maluluy-on kag
malulo. Pabutlakon Niya ang adlaw sang kaluwasan sa aton, kag pasilakon Niya
ini gikan sa langit…” Sa bagay nga ginhatag sa aton ang aton kapawa sa kabuhi
nga mangin aton gabay agud kita indi na magtalang sa aton nga direksyon bilang
mga anak sang Labing Mataas.Ang ambahanon ni Zacharias isa ka panawag sa aton
sa pagbinag-binag nga kita mga kaliwat sang kapawa kag kita ginala-uman nga
magkabuhi sang matarong nga pagkabuhi, magtindog sa kamatu-oran kag indi
magkalingkang sa paghimo sang mapag-on nga sadsaran tungud ang Diyos maga-ubay
sa aton. Sa aton pagginawi dapat lang nga ipakita naton ang husto nga pamaagi
agud kita makahatag sang maayo nga sulundan para sa tanan agud mangin tampad
man ang aton pag-alagad sa aton isigkatawo. Sa aton pagkabuhi, aton ipakita ang
hublas nga kamatu-oran kag indi kita magpanago sa landong sang pagpakuno-kuno
kay ang Ginhari-an sang Diyos nga aton ginahimud-osan nga pagabalayon, isa ka
katilingban sang pagkatampad kag indi sang pagpakuno-kuno, isa ka katilingban
sa yara sa kapawa sang kamatu-oran kag indi sang kabutigan, isa ka katilingban
nga nagatindog sa kapawa kag wala nagapanago sa kadulum.
Ining ambahanon
sang pagpasalamat ni Zacharias isa ka ambahanon sang bug-os nga katawhan bisan
nano man ang iya nga ginatu-ohan tungud ini pagpasalamat nga sa gihapon ang
Mahal nga Diyos nagatamud kag naga-ulikid sa Iya mga tawo nga nagakinahanglan
sang Iya padayon nga pag-upod kag pag-alay-ay sa ila sa ila mga kinahanglanon.
Ini nagapahayag nga ang Diyos wala nagakalipat sa Iya mga promisa sa Iya mga
tawo nga sila mahatagan sing kasulhay sa tanan nila nga mga kabug-atan sa
kabuhi kag sa gihapon yara Siya nga nagasabat sa ila mga panghakroy, kag Siya
wala nagapabilin nga bungol kag bulag sa ila mga kinahanglanon. Ginapakita
lamang sa aton sa sini nga ambahanon ni Zacharias nga sa gihapon ang Diyos
maalwan sa aton tungud Siya isa ka Amay nga dili gid magpabaya sa Iya mga anak.
Ayhan ang bug-os nga katawhan nalumos sa lunang sang kasal-anan tungud sang mga
kaluya nga ginahuptan sang isa kag isa kag tungud sa kahimu-an sa Yawa, apang
karon nagalapus na ang kasanag agud kita hilwayon sa aton pagka-ulipon sa sala
kag sa panulay kag Siya magatuytoy sa aton sa dalan sang kamatuoran.
