PABUG-AT SA KABUHI
Isa ka adlaw, may selebrasyon sang “Silver Anniversary” sang kasal, kag natalupangdan sang pari nga “nagaluha-luha” ang bana samtang nagamitlang sila sang panaad sang pagpanibag-o sang ila nga sinumpaan sa kasal. Pagkatapos sang misa ginhambalan niya ang bana sing subong sini: “Migo, siguro malipayon ka gid sa inyo ika-25 ka tuig sang kasal no? Kita ko gid nga nalipay ka sing lubos nga nagatulo gid ang imo mga luha!” “Indi padre ah!” sabat sang bana. Sa pagkamatuod nagaluha ako sa kasubo! “Ngaman?” siling sang pari. Sabat sang bana: “Bal-an mo padre, sang nagligad nga 25 anyos, ginhambalan ako sang tatay sang akon asawa, nga sang matabo kami, kag indi ko gani pagpakasalan ang iya nga bata, ipa-priso nya ako sa sulud sang 25 anyos. Tani kon wala ako magpakasal, subong HILWAY na ako!” Ahay! Kadamo kita sang mga pabug-at sa kabuhi… kadamo sang mga nagapabug-at sini! May ara nga asawa ukon bana nga ulugtasan, may ara nga “monster-in-law”, este, mother-in-law gali, may pasaway nga mga kabataan, ‘plastic’ nga abyan, mortal nga kaaway, abusador nga “boss”, “terror” nga manunudlo, kag iban pa. Kon kaisa indi man tawo ang nagapabug-at sang aton kabuhi. May ulubrahon nga natak-an na kita, utang nga indi mabayaran, malas sa negosyo, kabudlayan sa pagtu-on, manubo nga sweldo, kamalahalon sang balaklon, kag iban pa!
May “good news” kag “bad news” sa Ebanghelyo subong nga Domingo. Ang “bad news” nga wala nagpangako ang aton Ginoo nga kuhaon Niya ang aton mga “palas-anon” sa kabuhi. Apang ang “good news” amo nga PAMAG-ANON Niya ang aton mga ginapas-an.
Ang ginasiling sang aton Ginoo nga gamiton naton ang Iya nga “gota”. Amo ini ang kahoy nga ginabutang sa abaga sang sapat agud mangin mamag-an ang iya pagbutong sang mga pagkabutang. Kon igo-igo lang ang gota, indi mabudlayan ang sapat. Ano ini nga gota? Wala sing iban kundi ang Iya hantup kag wala’y katapusan nga paghigugma. Ang buot silingon sang aton Ginoo nga aton pas-anon naton ang aton mga kabug-atan sa kabuhi nga may daku nga paghigugma. Kon may yara lamang nga paghigugma sa tanan naton nga ginabuhat kada adlaw, mangin mamag-an ang aton paghakwat sini. Diutay lang nga yuhum, pagpamugno ukon pangamusta, sarang na makapaumpaw sang kakapoy, kasakit, kag kasubo. Aton tandaan nga ang Diyos indi maghatag sa aton sang palas-anon nga indi naton masarangan sa pagpas-an. Siya kaupod naton sa aton mga kabudlayan kag mga palaligban sa aton kabuhi. Ang aton nga pangamuyo kuntani mangin kasubong sini: “Ginoo, indi pagkuhaa ang akon mga palas-anon, sa baylo hatagan Mo ako sing kusog nga mahakwat ang mga ini sa pamaagi sang Imo nga paghigugma… paghigugma nga wala nagapamatok…. paghigugma nga indi maisip… paghigugma nga indi sing maiya-iyahon.
Sa aton pag-angut sang aton nga mga palas-anon sa paghigugma sang aton Ginoo, mangin mamag-an ang aton paghakwat sini, tungud kay yara lang Siya nagaupod sa aton sa paghawat sang tanan.
LIGHTER SIDE:
TEN TIMES
Peter said to his wife Claudia, "You will not believe what happened today! I bought an old lamp at the junkyard sale and guess what? I rubbed it and out came a genie!"
Claudia said excitedly, "Really?? Did you ask for anything?"
Peter replied, "Yes i did. I asked for your intelligence to be enhanced ten times."
Claudia said, "Oh! That's so sweet of you."
Peter retorted, "Yeah, but I forgot anything multiplied by zero remains zero."
FOOD FOR THOUGHT
The truest help we can render an afflicted man is not to take his burden from him, but to call out his best energy, that he may be able to bear the burden.
(Phillips Brooks)
