13th Sunday in Ordinary Time (B)

MAGBUGTAW KA!

  May hulubaton kita nga nagasiling: “Mabudlay pukawon ang nagapatulog-tulog sang sa nagakatulog!” Tungud aton nahibalu-an nga ang nagapatulog-tulog, naga-”drama” lamang ukon nagahatag sang impresyon nga kuno siya nagakatulog apang sa minatu-od, bugtaw siya. Ini nga hulubaton ayhan nagtuhaw tungud sa aton madalum nga mga eksperyensya sa kabuhi nga sa masami sa aton “muklat” nga pag-ginawi, may mga tawo nga nagapakuno-kuno nga sila daw nagakatulog… nga daw sila wala makakita, ukon nagapabulag-bulag! Ini nga mga klase sang mga tawo makabig naton nga daw mga “nagalakat nga mga patay”- mga “walking- deads” tungud wala sila sang labut sa nagakahanabo sa ila nga “katilingban” ukon “komunidad”. Ini nga mga tawo naghi-mo sa ila kaugalingon nga “isla”, sa bagay nga ang ila kaangtanan sa iban, nautod kag  gani “patay” ang ila nga relasyon sa ila isigkatawo. Daw ano kasubo sini nga kahimtangan… daw ano ka makalulu-oy… daw ano kalain! Ngaman? Tungud ang tawo isa ka “sosyal” nga tinuga– ang iya kabuhi napatuhoy para sa iban, sa iya kaangtanan sa ila kag iya pagbalay sang relasyon sa iya isig-kapareho.

  Sa aton Ebanghelyo, ang aton Ginuo “nagpukaw” sang isa ka “nagakatulog” nga dalagita, nga suno sa mga tawo “patay” na! Ini nagapakita lamang nga sa aton Ginuo, wala sang lugar ang kamatayon. Padayon kita nga naangut sa isa kag isa tungud Siya amo ang Diyos sang kabuhi! MAGBUGTAW kita kag MAGBALAY sang maayo nga relasyon sa tagsa-tagsa!

12th Sunday in Ord. Time (B)

MAGLINAW KA...YARI AKO!

May isa ka turista nga nagpaligo sa “Lake Genezareth”, nga nagapalutaw-lutaw sa malamig kag malinaw sini nga tubig. Apang sang hinali, nakibut kag kinulbaan sya sa tubig nga gulpi lang “nagngurub”, nagdalagku kag nagbinung-gu-anay ang mga balud. Abi niya may mabaskug na nga bagyo, ukon may naglabay nga barko ukon may daku nga nga ‘tornado’.           Amo ini ang aton Ebanghelyo subong, kon sa diin hinadlukan gid ang mga Apostoles sang bulobaliswaon sang mga balud ang ila ginasakyan nga baroto. Ang turista sa aton istorya naka-eksperyensya sang ginatawag nga “east wind” o hanging habagat nga gina-siling, nga bisan ano pa ka kanami sang panahon, hinali lang ya mahuyop ang mabaskug nga hangin. Suno sa mga nakasiyasat, ang baroto nga ginsakyan sang mga Apostoles kag sang aton Ginoo may yara nga isa  ka dupa kag tunga ang haba kag isa ka dupa ang lapad. Kon sakyan sang mga anum ka tawo, ini madali  lang nga ma-ubon. Gani maintindihan ta gid ang kakulba sang mga Apostoles, bisan pa sila kahibalo maglangoy kag lagting nga mga mangingisda, sang ang ila baroto bulobaliswaon sang mga balud.

Ang kahulogan sang Ebanghelyo subong, indi nga ginapakanay ni Kristo ang hangin kag tubig didto sa Galilea, kundi nga, SA BISAN DIIN NGA YARA SI KRISTO, BISAN PA MAY BAGYO O MAGARUT ANG TIEMPO, ANG PANAHON MAGALINAW SING SEGURADO. Si Kristo wala nagpromisa nga tungod kita mga Katoliko, mangin matawhay ang aton kabuhi. Ang Iya lamang ginhambal amo nga bisan kita padayon nga ginahampak sang “balod” kag balatian, pagluib, katalagman, kaluya o bisan kamatayon, Sia magaupod sa aton sa paghatag sing kalinaw kag paghidaet.

Si Santa Teresa et Avila ginsulay sang una kontra sa iya sinumpaan nga kaulay. Ang iya mga pa-ngamuyo daw indi makabulig sa iya kag daw tuman kalayu sang Dios. Isa ka aga, sang magtulutawhay na ang pagsulay, nagreklamo sia sa Ginoo: “Sa diin bala Ikaw Ginoo samtang ginasulay ako?” “Sa imo taguipusuon”, siling sang Ginoo.

11th Sunday (B)

11^th SUNDAY -B

  Ang aton Ebanghelyo subong nga Domingo naghatag sa aton sang laragway kon ano ang Ginharian sang Mahal nga Dios. Suno sa aton Ginuo, ang ginharian sang Dios kaangay sang tawo nga nagsab-og sang binhi sa iya uma. Nagakatulog siya kon gab-i apang ang binhi padayon nga ginapatubo sang duta. Ukon katulad ini sang isa ka binhi sang mostasa– ang pinaka-labing diutay nga binhi sa kalibutan apang kon itanum ini nagatubo kag nagadaku ini sa bagay nga ang mga pispis nagapugad sa iya mga sanga nga mahandong. Ano bala ang ginapatuhuyan o ang ginapadulungan sini nga palaanggiran?

  Matuod nga wala makahibalo ang manugsab-og kon paano ginapatubo sang duta ang binhi, apang sa aton simple nga paghibalo, ang binhi nagatubo tungud ini gin-atipan sa likud sang aton “katulugon” sang        Taghatag sang kabuhi sang tagsa-tagsa. Ang binhi nagatubo nga wala sa aton ihibalo apang ini nahibaluan tanan sang aton Amay sa langit.

  Tungud sang paghigugma sa aton sang aton Amay sa langit, kita ginahatagan sang mga bugay nga kalan-on kag kasulhayan sa aton tagsa ka kabuhi. Pagkaon nga bunga sang mga patubas sang aton mga pananum, kag kasulhayan nga ginadulot sang mga “landong” sang mga kahoy nga amo ang aton nangin “pasilungan” sa tag-ilinit sa aton kabuhi.

  Ginahatagan naton karon nga Domingo sang pagtalupangud ang aton mga amay sa selebrasyon sang “kinaandan” nga “Father’s Day”. Ini agud aton nga mapakita nga ang aton mga amay amo ang mga haligi sang aton pamilya nga nagapabakud sang institusyon sang panimalay. Para sa isa ka bata, si tatay amo ang iya “superman”. Kuntani tularan sang tagsa ka tatay ang kaalwan sang PAGKA-AMAY sang aton Dios nga manughatag sang tagsa ka maayo sa iya mga anak!                                                            

                                                                                                                                                            

ANG PAGTUBO, PAGBAG-O KAG    PAGSANYOG, ISA KA LAYE SANG KABUHI. Indi kita pwede magpabilin sa isa lang ka lugar nga daw wala sing labot kag “amo-na-gid-lang-kita-sini”. Wala sang permanente sa sining kalibutan. Tanan kita may kapasidad nga magtubo, magsangkad kag mangin hamtong.

Bisan “gagmay” lang kita, ang labing importante nga nagabuhat kita sang aton mga buluhaton nga may dalagku nga paghigugma. Sa sini, kita NAGATUBO!

Body & Blood of Christ (Corpus Christi) (B)

KALIG-ONAN SANG KASUGTANAN !

  Kapiestahan Solemne karon nga adlaw sang Hamili nga Lawas kag Dugo sang aton Ginuong Jesukristo. Ini nga pagpadungug sa aton Ginuo nagatumud sa isa ka daku nga Misteryo sang paghigugma nga ginpatuhoy sang Dios sa aton tanan– ang paghigugma nga nag-abut sa paghalad sang kabuhi sang Iya nga  Anak agud kita matubos gikan sa pagka-ulipon sang sala.

  Ini nga selebrasyon aton ginpanubli sa selebrasyon anay sang mga Judeo. Sila may selebrasyon sang Paskwa sa pagsaulog sang ila kahilwayan gikan sa Ehipto nga ginasimbolo sang duha ka mga bagay-  ang TINAPAY nga wala sing lebadora nga nagsimbolo sang kahilwayan, kag ang DUGO (kalis sang bino) nga nagasimbolo sang paghimo sang Israel bilang banwa nga pinili sang Dios.

  Ang ginbuhat sang aton Ginuo sa katapusan nga panihapon indi lamang sang isa ka paghanduraw sang selebrasyon sang mga Judeo kundi isa ka paghatag man sa aton sang isa ka SINUMPAAN indi lamang paagi sa tinapay nga nagakapan-os, kundi paagi sa tinapay nga amo ang Iya kaugalingon nga lawas, kag indi lamang paagi sa dugo sang mga sapat, kundi paagi sa Iya kaugalingon mismo nga dugo nga amo ang nagasilyo sini nga kasugtanan kag kahilwayan.

  Paagi sa Iya ginbuhat sa katapusan nga panihapon, Iya ginhatagan sang bag-o nga kahimtangan ang kaangtanan sang Dios kag sang tawo. Ang kasugtanan karon sa tunga sang tawo kag sang Dios nangin isa ka MALAHALON nga kasugtanan tungud ini ginpalig-on sang PAGHALAD SANG KABUHI sang aton Ginuo– LAWAS KAG DUGO– nga ginpamihak-pihak kag ginpa-ilig sa aton agud aton maangkon liwat ang dignidad nga kita mga anak sang Dios.