Palm Sunday

RAMOS SANG PAGDAYAW

  Ang ginasaulog naton subong nga Domingo amo ang pagsugud sang aton ginahanduraw nga Semana Santa– ang Semana nga sa diin ang aton Ginuong Jesukristo nag-antus, namatay kag nabanhaw. Ini nagapatpat naman sa aton sang mga kasakit nga gin-agihan sang aton Ginuo agud maagum naton ang kaluwasan tungud sang aton pagkamalalison sa kasuguan sang paghigugma sang Diyos.

  Aton makita karon nga Dominggo ang “mahimayaon” ukon ang kadayawan nga ginhatag sang mga Hudiyo sa aton Ginuo nga ila ginakabig nga amo ang magahilway sa ila sa pagkaulipon sang Emperyo Romano. Ginasinggitan nila nga si Kristo amo ang ila nga “Hari”, sa bagay nga nagapa-abut sila sang isa ka kahilwayan politikal.

  Apang sa pihak nga bahin, lain sang sa ginapa-abut sang mga Hudiyo, ang aton Ginuo wala magdala sang pagbag-o sang politikal nga estado sang mga tawo, kundi ang Iya nga ginbag-o amo ang ila “tagipusuon”- ang ila nga nabugto nga kaangtanan sa Diyos. Si Jesus wala magdala sang kahilwayan politikal, kundi sang kahilwayan sang kalag nga naga-id sa gapos sang sala!

  Ang pagkahari sang aton Ginuo wala masandig sa trono nga malahalon, kundi sa trono sang tagipusuon sang tagsa-tagsa.

  Sa aton pag-abi-abi sa Iya sa sini nga Domingo kabay nga Siya MAGHARI sa aton kabuhi! Paluntaron naton ini nga hitabo sang Iya nga pagkahari indi lamang sa subong nga Domingo sang Lukay-lukay, kundi sa tagsa ka tini-on sang aton “normal” nga pagpangabuhi. Iya kita mga sumulunod kag nagakaigo gid nga kita nagasunod sa Iya sa tanan nga tion.

                                                                FR. RONNIE

5th Sunday of Lent (C)

ANG PAGHIBI NI JESUS

  Ginapahayag sang aton Ebanghelyo subong ang pagka-”tawohanon” ni Jesus. Siya nagbatyag sang kasubo sa pagkamatay sang iya nga pinakasuod nga abyan, sa bagay nga Siya nagpatulo sang Iya nga luha.

  Subong man sini ang aton nabatyagan kon ang aton pinalangga mag-”biya” sa aton paagi sa kamatayon, may pagpangasubo nga nagaluntad sa aton tagipuso-on… may kapung-aw… may kahidlaw. Kon mapatay ang aton pinalangga, daw may yara man nga “nagakapatay” sa aton kaugalingon. Ini tungud kay ang isa ka tawo nga mapatay, sa iya kamatayon ginadala man niya ang INDI NA MASULIT nga tinuga sa ibabaw sining duta! “When a person dies, something UNREPEATABLE also dies!” Indi na sarang masulit ang tawo. Wala sang may maka-ilog sa iya. Tungud ang tagsa-tagsa sa aton PINASAHI. Wala sing may makapareho sa aton.

  Amo ini ang nagakit-kit sa aton tagipusoon, kon ngaman ginasakitan kag ginasubu-an kita sa kamatayon sang isa ka pinalangga. Amo man ini ang nabatyagan sang aton Ginuo, bilang isa ka tawo.

  Apang sa sini nga hitabo, gingamit ini sang aton Ginuo nga mangin pamaagi sa pagpahayag sang kamatuoran sang Iya ginapanudlo nahanungud sa PAGKABANHAW.   Ang pagkabanhaw ni Lazaro aton man nga pagkabanhaw, paagi sa aton PAGBANGON sa isa ka bag-o nga kabuhi!

                                                                                                                                             FR. RONNIE

FOOD FOR THOUGHT

“A position of authority is neither necessary nor sufficient for the exercise of leadership.” (Eric Werkowitz)

4th Sunday of Lent (C)

NAGBALIK NGA NAKAKITA

  Ang pagsumalang sa aton Ginuong Jesus masami nagapakita sang isa ka PAGPANIBAG-O, suno sa mga ginapahayag sang mga pulong sang Ebanghelyo. Amo gani nga ginatawag ang pulong sang Diyos nga MAAYONG BALITA.

  Amo ini ang natabo sa isa ka bulag sugud pa sa iya pagkatawo. Suno sa pagpati sang mga Judeo, ini nga mga kakulangan sang isa ka tawo, nagapahayag lamang sang “silot” sang Diyos, ayhan tungud  sa kasal-anan sang iya mga katigulanggan, ginikanan, ukon ang iya personal nga mga kasal-anan. Kon sa aton pa: “Mirisi! Amo na kay damo ka na sang sala sa Diyos!”

  Amo bala ini nga sahi sang Diyos ang ginapakilala sang aton Ginuo? Suno sa aton Ebanghelyo, ang aton Ginuo, naghimo sang seremonyas sang pagpang-ayo sa sini nga bulag, kag ginpalakat siya sa paghugas sang iya mga mata sa “punong” sang Siloe (ang lugar nga nagakahulugan “Ginpadala”). Kag sa pagsunud sang bulag sa ginpabuhat sang aton Ginuo, natabo ang milagro sang PAG-AYO– Nakakita siya!

  Ang panahon sang kwaresma, isa ka ti-on sa diin kita ginapabatyag sang kaluoy kag pagpatawad sang Diyos tungud sang Iya nga paghigugma sa aton. Indi Siya sang Diyos nga nagadumut, ukon Diyos nga matimaluson. Siya Diyos nga nagalab-ut sa Iya mga tawo kag handa sa paghatag sang kahigayunan sa tagsa-tagsa sa paglakat sa idalum sang kasanag sang Iya pagpatawad kag gugma.

  Ang pagsumalang sa aton Ginuo, nagatulud sa aton sa pagbalik nga may bag-o nga panan-awan. Bag-o nga mga mata nga makakita sang maathag! - Makakita sang kamayaran kag indi ang kalainan!

                                                                                                                                            FR. RONNIE

FOOD FOR THOUGHT

“No one is in control of your happiness but you; therefore, you have the power to change anything about yourself or your life that you want to change.”(Barbara de Angelis)