3rd Sunday of Lent (A)

ANG NAGLIGAD KAG ANG PALAABUTON

  Ang aton Ebanghelyo sa sining ikatatlo nga Dominggo sang Kwaresma, nagapakita sa aton sang pagsumalang sang aton Ginuo sa isa ka babayi nga Samaria sa isa ka “bubon”.

  Ang bubon sa isa ka disierto, masami nga madalum, agud makakuha ka sang bastante nga tubig, kag suno sa kustumbre sang mga Israelinhon, ang mga babayi amo ang “nagasag-ub” sang tubig. Amo gani nga ang aton eksena subong nga samtang ang aton Ginuo ‘naga-inum’ sang tubig sa amo nga bubon, may isa man ka babayi nga manugsag-ug sang tubig, kag ayhan ini nga babayi ginakapoy na sa sige gid nga binalik-balik sang pagsinag-ub. Sang iya mabati-an ang aton Ginuo nga nagasiling nga Siya may igahatag nga tubig nga kon siya makainum, INDI na gid siya pag-uhawon liwat, daw maano siya sa kalangkag sa pagpangayo sini sa aton Ginuo!

  Apang ang aton Ginuo, nagatumud sa isa ka mas madalum pa gid nga bubon, kag ini amo ang bubon sang iya TAGIPUSU-ON. Kon siya lamang magkabuhi sa KAMATUORAN, kag indi magpanago sa landong sang kabutigan, siya makaita sang tuburan sang isa ka bag-o nga kabuhi sa diin ang Diyos amo ang iyamangin KAPUPUN-AN.

  Nakahibalo ang aton Ginuo nga ini nga babayi may nagligad– nga siya nagkabuhi sa pito ka lalaki, kag ang iya ginapuyo subong indi sang iya nga bana, apang ginpasalig siya sang aton nga Ginuo, nga indi tungud kay siya may nagligad, wala na siya sang palaabuton. Siya sa gihapon, ginahigugma sang Diyos kon siya handa sa paglakat sa dalan sang pagbag-o!

FR. RONNIE

ANECDOTE

Ugly person illness

A very ugly man made an appointment with a psychiatrist. The man walked into the doctor's office and said, "Doctor, I'm so depressed and lonely. I don't have any friends, no one will come near me, and everybody laughs at me. Can you help me accept my ugliness?"

"I'm sure I can." the psychiatrist replied. "Just go over and lie face down on that couch."

FOOD FOR THOUGHT

“The deepest craving of human nature is the need to be appreciated.” (William James)

                          

2nd Sunday of Lent (A)

ANG IYA GUYA NAGMASILAW

  May mga tinion sa aton kabuhi nga ang aton mga mata ”naga-inggat” tungud sa kalipay, ukon ang aton guya, may ginapahayag nga “kapagsik”- indi ka “haggard” lantawon. Ini naga-abut sa aton sa masami kon kita maka-eksperyensya sang matahum nga balatyagon. Ini ginapahayag man sang una sa mga “love-letters” nga nagasiling: “Just being with you, I feel like walking on pink clouds!” Daw kanami lang batyagon kon ikaw “in-love”… daw ang tanan ara lang sa estado sang “ecstacy”- gikan sa tinaga nga “ex– stasis” buot silingon “ikaw nagatindong sa GWA SANG IMO KAUGALINGON.”- daw nagalutaw-lutaw lang ikaw sa kahanginan.

  Sa aton Ebanghelyo subong, ang aton Ginuo, nag-eksperyensya man sining “moment of ecstacy” sa bagay nga nagmasilaw ang iya nawong, kag bisan pa gani ang iya nga bayu, nagmaputi nga wala sa bug-os nga kalibutan nga makatumbas sang kaputi sini! Siya nakabatyag sini tungud Iya na nakita ang Iya ginahulat nga himaya nga pagapakig-ambitan kaupod sa Iya Amay, kon matapos na ang Iya nga misyon sa paghalad sang Iya nga kabuhi sa Krus!

  Ang presensya ni Moises kag ni Propeta Elias nga nagpahayag sang ila mga kaugalingon sa aton Ginuo, naghatag man sa aton Ginuo sang kabakud sa     paghatag sang katumanan sa binubuot sang Amay.

  Ang “TRANSFIGURATION” indi lamang sang tion sang paputi-puti sang mga bayo ukon pagmasilaw sang guya. Ini tion sa pagpainu-ino nga sa likud sang kasakit, may paglaum kag tunay nga KALIPAY!

                                                                                                                                               FR. RONNIE

FOOD FOR THOUGHT

“Life is not measured by the breaths you take, but by its breathtaking moments.” (Michael Vance)

1st Sunday of Lent (A)

HABOK VS KUPOS

  Ang tanan nga mga pagsulay ginapatuhoy una sa tanan sa aton BUGAL. Ang panulay nagasudyut sa aton PAGPAHABOK sang aton kaugalingon… Kon ikaw Anak sang Diyos… kon ikaw ang hari… kon ikaw ang manager… kon tunay ka nga lalaki… kon ikaw maisug...kag iban pa nga mga panghangkat. Sumulud gani kita sa sini nga patibong, ang tanan mahapos na para sa demonyo!

  Suno kay San Mateo sa aton Ebanghelyo, ang panulay indi sang tinuga nga may sungay, may bangkil, may ikug, ukon isa ka maitum nga “monster”. Para kay San Mateo ang panulay amo ang isa nga NAGASUDYOT O NAGA-ASOT sa aton sa pagbuhat sang kontra sa binubuot sang Diyos… naga-asot sa aton sa pagbuhat sang MALAIN. Sarang ini sila nga mangin aton barkada, pinakasu-od nga abyan, ginikanan, ukon utod! Amo ini sila ang nalipay maglantaw nga amat-amat naton nga ginasamad ang aton kaugalingon kag pangabuhi.

  Ang demonyo nagatudlo sa aton sa paghandum sang isa ka mahapus nga pamaagi, ang pinakamadasig nga pahito, ang pinaka-”short-cut” sang mga butang nga aton ginahandum. Gani ang demonyo nagapakita sa aton sang “instant” nga resulta, mangin “sikat” pirmi, kag mangin manggaranon sa padali nga paagi.

  Sa aton pagsugud sang panahon sang Kwaresma, ginapakita sa aton sang aton Ginuong Jesus ang pagpakigbato sa sini nga mga pagsulay– ang minatuod nga kadalag-an indi sa pamaagi nga masulhay kundi sa pamaagi sang KRUS!

                                                               

FOOD FOR THOUGHT

“It is the weak man who urges compromise -- never the strong man.” (Elbert Hubbard)