8th Sunday in Ord. Time (A)

SWEET SURRENDER

  Amo ini ang titulo sang kanta ni John Denver. Ini nagapadayon sa masunod nga mga tinaga: “Sweet, sweet surrender, live, live without care. Like a fish in the water, like a bird in the air.” Ini nagapahayag sang panglantaw sang kabuhi nga may PAGSALIG!

  Sa aton Ebanghelyo subong, ginapakita sang aton Ginuo ang sabat sa masami naton nga ginapamangkut sa aton kabuhi: “San- o pa bala ako makapahuway?” Sa aton pagkabuhi nagakalumos-lumos na kita masami sa sobra nga kasaku-on o kapakaton. Ginakulang na ang aton kaugalingon sa pahuway. Indi bala nga kon agdahon kita sa mga buluhaton ukon mga aktibidades, ang masami naton nga ginasabat: “Kamo nalang, kay kakat gid ako”. Kakat sa ano? Sa pagpangita sang aton pangabuhi-anan.

  Gina-agda kita sang aton Ginuo sa paglantaw sa mga kapispisan sa kahawaan, kag sa mga bulak sa latagon. Wala sila nagapanrabaho, apang GINASAGUD sila sang aton Amay sa langit! Ayhan pa kita nga gintuga sa laragway sang Diyos?

  Wala nagasiling ang aton Ginuo nga magpalando-lando kita sa aton kabuhi, kundi nga katulad sa mga kapispisan kag mga bulak, aton ipahamtang ang aton kabuhi sa BUG-OS nga PAGSALIG sa aton Amay sa langit. Isa ka kabuhi nga MAPINASALAMATON kon ano man ang IHATAG sang Diyos sa aton, kag indi na kita maghandum sa mga bagay nga sa pagkamatuod, INDI MAN gani naton KINAHANGLANON! Kon ang Diyos amo ang NAGAPUNO sa aton, ang tanan PAAMAN nalang!

FOOD FOR THOUGHT

“A table, a chair, a bowl of fruit and a violin; what else does a man need to be happy?” (Albert Einstein)

7th Sunday Ord. Time (A)

MANGIN… HIMPIT!

  Sang ang aton Ginuong Jesus ang nag-interpretar sang layi, Iya ini ginhatagan sang bag-o nga kahulugan. Iya ginpahayag ang matuod nga “painu-ino” sang Amay. Ang layi indi lamang pagkuhaan sang base sa iya “minimo” nga talaksan nga amo ang “hustisya” kundi may malapad ini nga sadsaran nga amo ang “bugay kag paghigugma” sang Diyos.

  Ang “daan” nga layi sang PAGTIMALOS, isa lamang nga “limitado” nga tikang sa pag-angkon sang kahusayan! Ano gid kon makabalos ka? Ano dayon? Ini magatuga lamang sang pagtimalos man sang imo nga ginbalusan. Gani ang matabo, BALUSAY– Balos-balos… wala sang katapusan. Sa ulihi nagatini-og-ti-ug nalang kita sa sistema sang isa ka kadena nga indi mabadbad!

  Ang aton Ginuo naghatag sang isa ka sahi sang kabuhi (way of life) nga nagbag-o sang kahulugan sang layi sang pagtimalos. Ang layi nga mapiguson, nahimo nga gabay sang kabuhi sang paghigugma kag kaluoy! Para sa aton Ginuo, ang pagtuman sang layi indi mapuno paagi sa pagtimalos, kundi sa pamaagi lamang sa PAGHIGUGMA!

  Ano bala ang nagahimo sang Kristiyanismo nga lain sang sa iban nga relihiyon sa bug-os nga kalibutan? Ini amo ang GRASYA ukon BUGAY sang Diyos– sa pagkabig sa aton isigkatawo INDI suno sa aton talaksan, kundi suno sa talaksan sang Diyos!- Ang Diyos maalwan sa maayo kag malain… sa mga balaan kag mga makasasala— tungud Siya HIMPIT! Bilang Iya mga anak  kita man ginaagda nga mangin himpit!

                                                                                                                                                FR. RONNIE

FOOD FOR THOUGHT

“Nothing is complete and thus nothing is exempt from criticism.” (James Luther Adams)